لاہور: (دنیا نیوز) پی ڈی ایم اے پنجاب نے مون سون بارشوں کے باعث ہونے والے نقصانات کی رپورٹ جاری کر دی۔
رپورٹ کے مطابق رواں سال مون سون بارشوں کے باعث پنجاب میں 103 شہری جاں بحق اور 393 زخمی ہوئے ہیں جبکہ بارشوں سے 128 مکانات متاثر اور 6 مویشی ہلاک ہوئے۔
پی ڈی ایم اے کے ترجمان کے مطابق گزشتہ 24 گھنٹوں میں مون سون بارشوں کے باعث 63 شہری جاں بحق اور 290 زخمی ہوئے، لاہور میں 15، فیصل آباد میں 9، ساہیوال میں 5، پاکپتن میں 3 اور اوکاڑہ میں 9 اموات رپورٹ ہوئیں۔
ڈی جی پی ڈی ایم اے کے مطابق وزیراعلیٰ پنجاب کی ہدایات پر زخمیوں کو بہترین طبی امداد فراہم کی جا رہی ہے جبکہ حکومت پنجاب کی پالیسی کے تحت جاں بحق افراد کے اہل خانہ کو امداد فراہم کی جائے گی۔
ڈی جی پی ڈی ایم اے کا کہنا ہے کہ صوبے بھر میں آج بھی مون سون بارشوں کا سلسلہ جاری رہے گا جبکہ دریاؤں اور ندی نالوں میں طغیانی کے پیش نظر الرٹ جاری کر دیا گیا ہے۔
رپورٹ کے مطابق خستہ حال اور بوسیدہ عمارتوں کی چھتیں گرنے کے باعث سب سے زیادہ اموات رپورٹ ہو رہی ہیں جس کے پیش نظر شہریوں سے گزارش کی گئی ہے کہ موسم برسات کے دوران احتیاطی تدابیر اختیار کریں۔
