کراچی: (دنیا نیوز) متحدہ قومی موومنٹ پاکستان کے رہنما ڈاکٹر فاروق ستار نے گاڑیوں اور موٹرسائیکلوں کی نمبر پلیٹس کی تبدیلی پر سندھ حکومت کو کڑی تنقید کا نشانہ بناتے ہوئے کہا ہے کہ اجرک کی آڑ میں لوٹ مار کا دھندا شروع کر دیا گیا جبکہ پیپلزپارٹی کے وزرا اور ان کے بچے فینسی نمبر پلیٹس استعمال کرتے ہیں۔
کراچی میں پارٹی رہنماؤں کے ساتھ پریس کانفرنس کرتے ہوئے ڈاکٹر فاروق ستار نے کہا کہ پیپلزپارٹی کے غیرجمہوری طرز عمل سے سندھ میں غم و غصہ ہے، اگر احتجاج کا راستہ نہ اپنایا گیا تو عوام اپنا راستہ خود نہ نکال لیں۔
انہوں نے کہاکہ سندھ میں پیپلز پارٹی کا طرز حکمرانی بدترین ہے، ایم کیوایم نے پیپلزپارٹی کو بہتری کے لیے کافی وقت دیا ہے، پیپلزپارٹی کوپتہ بھی نہیں چلے گا کب ان کے پیروں تلے زمین نکل جائے گی۔
انہوں نے کہاکہ پیپلزپارٹی کی حکومت نے کراچی کوتباہ کردیا ہے، وزرا اور ان کے بچےفینسی نمبرپلیٹ استعمال کرتے ہیں جبکہ اندرون سندھ تو کوئی نمبرپلیٹ استعمال ہی نہیں کرتا، مگر کراچی کے لوگوں کو بے جا پابندیاں عائد کر کے ذبح کیا جارہا ہے، اجرک کے نام پر لوٹا جا رہا ہے۔
متحدہ کے رہنما نے کہاکہ لیاری میں گرنےوالی مخدوش عمارت کےرہائشیوں کےلیے کچھ نہیں کیا گیا، صرف ایس بی سی اے پر ذمہ داری ڈال کرجان چھڑالی گئی، مخدوش عمارت کے رہائشیوں کو متبادل جگہ فراہم کرنا وزیر بلدیات کی ذمہ داری ہے۔
فاروق ستار نے مخدوش عمارتوں کےحوالے سے وزیربلدیات سے استعفیٰ کا مطالبہ کرتے ہوئے کہا کہ مخدوش عمارتوں کےکیس میں وزیربلدیات کوایف آئی آرمیں شامل کیا جائے، سیہون کےافسران کی کراچی میں تعیناتی کی مذمت کرتےہیں، اس طرح کےاقدامات سےشہری اوردیہی آبادی میں نفرت بڑھ رہی ہے۔
