کوئٹہ: (دنیا نیوز) مارگٹ آستنگی میں قتل کے واقعے پر جوڈیشل مجسٹریٹ کے حکم پر قبر کشائی کی گئی۔
ذرائع کے مطابق قبر کشائی جوڈیشل مجسٹریٹ اختر شاہ کی نگرانی میں کی گئی، قبر کشائی کے بعد مقتولین کا پوسٹ مارٹم پولیس سرجن عائشہ فیض نے کیا۔
قبر کشائی کے موقع پر پولیس اور دیگر قانون نافذ کرنے والے اداروں کے اہلکار بھی موجود تھے، پوسٹ مارٹم کرنے کے بعد دوبارہ مقتولین کی لاشوں کو قبر میں دفنا دیا گیا۔
ذرائع کے مطابق پوسٹ مارٹم جوڈیشل مجسٹریٹ کی موجودگی میں کیا گیا، خاتون کو 9 گولیاں جبکہ مرد کو 7 گولیاں ماری گئیں۔
11 ملزم گرفتار
علاوہ ازیں بلوچستان کے علاقے سنجدی ڈیگاری میں پیش آنے والے افسوسناک واقعے میں اب تک 11 ملزمان کو گرفتار کیا جا چکا ہے اور واقعے کا مقدمہ بھی ہنہ اوڑک تھانے میں درج کیا جا چکا ہے۔
کوئٹہ پولیس نے ملزمان کیخلاف انسداد دہشت گردی ایکٹ زیر دفعہ 302 ت پ اور دیگر دفعات کے تحت مقدمہ درج کیا ہے۔
ایس ایچ او نوید اختر تھانہ ہنہ اوڑک کی مدعیت میں مقدمہ درج کیا گیا ہے، مدعی نے تھانہ میں تحریری درخواست دی کہ ویڈیو وائرل ہوئی جس میں خاتون اور مرد کو فائرنگ کر کے قتل کیا گیا۔
ایف آئی آر کے متن کیے مطابق پولیس نفری کے ہمراہ جائے وقوعہ سنجیدی ڈیگاری مارگٹ پہنچ، معلومات کرنے پر علم ہوا کہ واقعہ عیدالاضحیٰ سے تین روز قبل کا ہے، واقعہ میں بانو بی بی اور احسان اللہ کو فائرنگ کرکے قتل کیا گیا۔
مدعی مقدمہ نے کہا ہے کہ تمام افراد مرد اور خاتون کو قتل کرنے سے قبل سردار شیر باز خان کے پاس لیکر گئے، واقعہ کے دوران ویڈیو بنائی گئی اور سوشل میڈیو کے ذریعے اپ لوڈ کر کے عوام میں خوف و ہراس پھیلا گیا۔
فائرنگ کرنے والوں میں شاہ وزیر، جلال، ٹکری منیر، بختیار، ملک امیر، عجب خان شامل ہیں، سردار شیر باز خان نے فیصلہ سنایا کہ خاتون اور مرد کار و کاری کے مرتکب ہوئے ہیں، انہیں قتل کر دیا جائے۔
معاملے میں جان محمد، بشیر احمد اور دیگر 15 نامعلوم افراد بھی شامل ہیں، فیصلے کے بعد مرد اور خاتون کو گاڑیوں میں لیکر سنجیدی ڈیگاری مارگٹ لاکر فائرنگ کر کے قتل کر دیا گیا۔
پولیس ذرائع کا کہنا تھا کہ پوسٹ مارٹم رپورٹ سے معلوم ہو گا کہ خاتون اور مرد کو کتنی کتنی گولیاں ماری گئیں، معلوم ہو گا کہ واقعہ کتنے دن پرانا ہے۔
خیال رہے کہ بلوچستان کے علاقے سنجدی ڈیگاری میں غیرت کے نام پر مرد و عورت کو فائرنگ کر کے قتل کرنے کا واقعہ پیش آیا تھا جس کی ویڈیو گزشتہ روز منظر عام پر آئی تھی، وزیر اعلیٰ بلوچستان میر سرفراز بگٹی نے واقعے کا نوٹس لیا تھا۔
وزیراعلیٰ بلوچستان سرفراز بگٹی کا کہنا ہے کہ آپریشن جاری ہے، تمام ملوث افراد کو کیفر کردار تک پہنچایا جائے گا، ریاست مظلوم کے ساتھ ہے۔
