کراچی:(دنیا نیوز) متحدہ قومی موومنٹ (ایم کیو ایم) پاکستان کے سینئر رہنما ڈاکٹر فاروق ستار نے کہا ہے کہ پاکستان کو چلانا ہے تو کراچی کو چلانا ہو گا۔
کراچی میں میڈیا سے گفتگوکرتے ہوئے فاروق ستار کا کہنا تھا کہ شہر قائد میں ٹریفک پولیس بھتہ لے رہی ہے، کونسا ادارہ بچا ہے جو کرپشن جیسی الت سے بچا ہے، شہر میں عوام کے ساتھ سوتیلی ماں سے بھی بدتر سلوک ہورہا ہے۔
انہوں نے کہا کہ انتظامی مسئلے کی مکمل ذمہ داری صوبائی حکومت کی ہے، 18ویں ترمیم کے بعد آپ کے مزے لگ گئے، یہ کراچی سندھ کا مالی ،انتظامی اور سیاسی دارالخلافہ اور پاکستان کی ترقی کا انجن ہے۔
سینئر رہنما ایم کیو کا کہنا تھا کہ کراچی چلتا ہے تو پاکستان چلتا ہے، پاکستان کو چلانا ہے تو کراچی کو چلانا ہو گا، تم ہمارے زخموں پر مرہم رکھنے سے قاصر ہو، تمہاری سیاست بتا رہی ہے کہ اس شہر سے تمہارا کوئی لینا دینا نہیں، یہ شہر سندھ کے وڈیروں اور جاگیرداروں کیلئے لوٹ کا مال ہے۔
فاروق ستار نے کہا کہ آپ کیوں لوگوں کو یہ کہنے پر مجبور کررہے ہیں کہ کراچی سندھ کا حصہ نہیں، میئر کراچی کہتے ہیں ٹاؤنز میری ذمہ داری نہیں، کیا چند گلیاں،چند پارکس ہی تمہاری ذمہ داری ہے؟ یہاں ڈمپرز اورکنٹینرز لوگوں کو ماریں تمہیں پرواہ نہیں۔
ان کا کہنا تھا کہ گرین لائن خدا خدا کرکے تکمیل کو پہنچی ہے، گرین لائن وفاق کا منصوبہ تھا، ایم کیو ایم نے وفاقی حکومت کے سر پر سوار ہوکر گرین لائن منصوبہ مکمل کرایا، کےفور منصوبہ تم سے لیکر واپڈا کے حوالے کیا، کے فور 14سال تمہارے پاس تھا تم نے ڈیزائن ہی غلط بنایا۔
سینئر رہنما ایم کیو ایم نے کہا کہ پیپلزپارٹی کراچی کو اپنانے کیلئے تیار نہیں، کراچی میں جو شہادتیں ہورہی ہیں، دو لفظ تعزیت کے بولنے کیلئے تیار نہیں ہو، آپ سندھ کو کیوں تقسیم کی طرف لیکر جارہے ہیں؟ اندرون سندھ سے ہزاروں پولیس والے اٹھا کر یہاں لائے گئے، لیاری میں عمارتیں گررہی ہیں، وزیر بلدیات نے مخدوش عمارتوں پر ایک میٹنگ نہیں کی۔
فاروق ستار کا مزید کہنا تھا کہ پولیس میں کچھ کالی بھیڑیں ڈاکوؤں کی سرپرستی کررہی ہیں، 2روز میں زمان ٹاؤن میں دو شہادتیں ہوئیں، 8 گھنٹے تک اہل خانہ تھانے میں ایف آئی آر کیلئے بیٹھے رہے جب کہ جنوری سے اب تک کورنگی میں 50کے قریب ہلاکتیں ہوچکی ہیں۔
