لاہور: (محمد اشفاق) احسن بھون گروپ نے پنجاب بار کونسل کے اہم عہدوں پر میدان مار لیا، اشفاق کہوٹ وائس چیئرمین پنجاب بار کونسل، ذبیح اللہ ناگرہ چیئرمین ایگزیکٹو کمیٹی اور چوہدری مشتاق چیئرمین ڈسپلنری کمیٹی مقررکر دیئے گئے۔
چیئرمین الیکشن کمیشن نے نتائج کااعلان کردیا، پریزائیڈنگ آفیسرز کے فرائض ایڈووکیٹ وسیم ملتان نے ادا کیے۔
پنجاب بار کونسل کے دو عہدوں چیئرمین ایگزیکٹو اور وائس چیئرمین کے الیکشن کا انعقاد ہوا، الیکشن میں احسن بھون گروپ کے امیدوار بلا مقابلہ منتخب ہو گئے۔
ذبیح اللہ ناگرہ پنجاب بار کونسل کے چیئرمین ایگزیکٹو منتخب ہو گئے جبکہ ملک اشفاق کہوٹ بلا مقابلہ وائس چیئرمین پنجاب بار کونسل منتخب ہوئے ہیں۔
چوہدری مشتاق ایڈووکیٹ کو چیئرمین ڈسپلنری کمیٹی پنجاب بار کونسل مقرر کردیا گیا، اس موقع پر بلا مقابلہ منتخب ہونے والے امیواروں کو پھولوں کے ہار بھی پہنائے گئے۔
اس موقع پر ممبر پنجاب بار کونسل عرفان صادق تارڑ، منیر حسین بھٹی، چوہدری بابر وحید سمیت دیگر نے شرکت کی، پنجاب بار کونسل کے ووٹر ممبران کی تعداد 75 ہے۔
