کراچی :(دنیا نیوز) ر ہنما ایم کیو ایم رہنما فاروق ستار کے بیان پر سینئر وزیر سندھ حکومت شرجیل انعام میمن کا ردعمل سامنے آگیا۔
شہر قائد سے جاری اپنے ایک بیان میں سینئر وزیر شرجیل انعام میمن کا کہنا تھا کہ فاروق ستار کی شکایت وزیر اعظم سے ہے مگر غصہ سندھ حکومت پر نکال رہے ہیں، ذاتی شکوؤں کو سیاسی ایجنڈے میں بدلنا فاروق ستار کی پرانی روایت ہے۔
انہوں نے کہا کہ کل کی بارش کو جواز بنا کر سترہ سالہ بدعنوانی کا الزام لگانا دراصل اِن کی بوکھلاہٹ کی نشانی ہے، ایم کیو ایم کو یہ نہیں بھولنا چاہیے کہ وہ طویل عرصے تک اقتدار میں شریک رہے۔
سینئر وزیر کا کہنا تھا کہ کراچی کے عوام آج بھی ایم کیو ایم کی نام نہاد شہری حکومت کے دور کی کرپشن، جعلی بھرتیوں اور اداروں کی تباہی بھگت رہے ہیں، سندھ حکومت نے کراچی میں وہ کر دکھایا جو ایم کیو ایم اپنی چالیس سالہ تاریخ میں نہیں کر سکی۔
شرجیل انعام میمن نے کہا کہ شہر کے اہم علاقے شدید بارش کے بعد گھنٹوں میں معمول پر آگئے تو ایم کیو ایم بوکھلا گئی، این ڈی ایم اے اور پی ڈی ایم اے کے ساتھ مل کر ریسکیو اور ریلیف آپریشن کا عمل جاری ہے، بارش قدرتی عمل ہے، ایم کیو قدرتی آفت میں بھی سیاست چمکانے سے باز نہیں آتی۔
ان کا کہنا تھا کہ کراچی سندھ کا دل ہے اور رہے گا، شہر کو سندھ سے الگ کرنے کا بیانیہ کبھی کامیاب نہیں ہوگا، سندھ حکومت نے کراچی کے لیے اربوں روپے کے منصوبے مکمل کیے ہیں، پیپلز بس سروس، کے فور منصوبہ، اور انفراسٹرکچر کی بہتری اس کی مثال ہیں۔
سینئر وزیر نے مزید کہا کہ فاروق ستار کو چاہیے کہ وہ بے بنیاد الزامات کے بجائے اپنی جماعت کی سابقہ چالیس سالہ کارکردگی کا حساب دیں۔
