اسلام آباد: (دنیا نیوز) وزیراعظم شہباز شریف سے وفاقی وزیر سائنس و ٹیکنالوجی نوابزادہ خالد حسین مگسی نے وزیراعظم ہاؤس میں ملاقات کی۔
وفاقی وزیر سائنس و ٹیکنالوجی نوابزادہ خالد حسین مگسی نے وزیراعظم کو جھل مگسی گیس فیلڈ منصوبے پر بریفنگ دی۔
نوابزادہ خالد حسین مگسی نے وزیراعظم کو بتایا کہ جھل مگسی گیس فیلڈ منصوبے کے تحت گیس کی قومی ترسیل میں شمولیت سے درآمدی گیس پر انحصار کم ہوگا اور سالانہ 298 ملین ڈالر کی بچت ہوگی۔
یہ بھی پڑھیں: شہباز شریف کا حافظ نعیم الرحمان سے ٹیلیفونک رابطہ، امدادی سرگرمیوں کو سراہا
انہوں نے وزیر اعظم کو پراجیکٹ کے افتتاح کی دعوت دی، جو وزیراعظم نے قبول کر لی۔
شہباز شریف نے کہا کہ پاکستان میں موجودہ بیش قیمت قدرتی وسائل ملکی معاشی مسائل کے حل میں کلیدی کردار ادا کر سکتے ہیں۔
وزیرا عظم کا کہنا تھا کہ ملکی ذخائر کی بدولت درآمدی گیس پر انحصار کم ہونے سے زر مبادلہ کی بچت قابل تحسین ہے۔
شہباز شریف نے کہا کہ جھل مگسی گیس فیلڈ کی گیس کی قومی ترسیل میں شمولیت ایک احسن قدم ہے۔
