پشاور: (ویب نیوز) کوہستان میں 40 ارب روپے کے میگا کرپشن سکینڈل میں اہم پیش رفت ہوئی ہے، نیب خیبر پختونخوا نے مزید 5 ملزمان کو گرفتار کر لیا ہے۔
نیب کی جانب سے کوہستان میں 40 ارب روپے کے میگا کرپشن سکینڈل میں گرفتار ملزمان میں دو سابق بینک منیجرز اور اکائنٹنٹ جنرل آفس کے سینئر آڈیٹر شامل ہیں۔
نیب ذرائع کا کہنا ہے کہ کوہستان اسکینڈل میں اب تک مجموعی طور پر 15 ملزمان گرفتار کیے جا چکے ہیں ، 15ملزمان میں سے 10 جوڈیشل ریمانڈ پر جیل میں ہیں، جب کہ 5 ملزمان نیب کے پاس جسمانی ریمانڈ پر ہیں۔
ذرائع کے مطابق دیگر ملزمان میں کوہستان کی مختلف سکیموں کے ٹھیکیدار شامل ہیں، کوہستان سکینڈل میں سرکاری بینک اکاونٹ سے 40 ارب روپے ملی بھگت سے نکالے گئے تھے، جس کے بعد نیب نے تحقیقات کا آغاز کرتے ہوئے کارروائیوں کا سلسلہ شروع کیا تھا۔
یاد رہے کہ 26 جون کو خیبرپختونخوا کے ضلع کوہستان میں 40 ارب روپے مالیت کے میگا کرپشن سکینڈل میں نیب خیبرپختونخوا نے تحقیقات میں اہم پیش رفت کرتے ہوئے 5 ارب روپے کے مشکوک بینک اکاؤنٹس منجمد کر دیے تھے، کئی جائیدادیں اور قیمتی گاڑیاں بھی تحویل میں لے لی تھیں۔
نیب نے کوہستان سکینڈل کے ملزمان کے گھروں سے غیر ملکی کرنسی، 3 کلو سونا بھی برآمد کیا تھا، کروڑوں روپے مالیت کی 77 قیمتی لگژری گاڑیاں تحویل میں لی تھیں۔
رپورٹ کے مطابق اسلام آباد، راولپنڈی، ایبٹ آباد، مانسہرہ اور پشاور میں اربوں روپے مالیت کی 109 کمرشل پراپرٹیز سیل کی گئی تھیں۔
نیب نے ملزمان کے 4 فارم ہاؤسز، 12 کمرشل پلازے اور 2 کمرشل پلاٹس سیل کر دیے تھے، 30 گھر، 12 دکانیں، 25 فلیٹس، 175 کنال زرعی زمین اور دیگر اہم جائیدادیں بھی سیل کی گئی تھیں۔
