سیالکوٹ: (دنیا نیوز) شدید بارشوں اور سیلابی صورتحال کے پیش نظر آج سیالکوٹ میں تعلیمی ادارے بند رکھنے کا اعلان کر دیا گیا۔
ڈپٹی کمشنر صبا اصغر علی نے ہنگامی صورتحال کے پیش نظر لوکل تعطیل کا اعلان کیا، شدید بارشوں اور سیلابی صورتحال کے پیش نظر چھٹی دینے کا فیصلہ کیا گیا، ڈپٹی کمشنر سیالکوٹ صبا اصغر نے کہا کہ شہری اپنے گھروں میں رہیں اور بلا ضرورت سفر سے گریز کریں۔
صبا اصغر نے مزید کہا کہ شہری دریاؤں اور ندی نالوں پر ہرگز نہ جائیں، دفعہ 144 کا نفاذ ہے، خلاف ورزی پر کارروائی ہوگی۔
کوٹ مومن میں بھی سیلابی صورتحال کے پیش نظر آج تمام سکولوں میں چھٹی کا اعلان کر دیا گیا، تحصیل انتظامیہ نے بچوں کی حفاظت کے پیش نظر فیصلہ کیا، انتظامیہ کے مطابق سیلابی خطرات کے باعث تعلیمی سرگرمیاں آج معطل رہیں گی۔
واضح رہے کہ بھارت کی جانب سے دریاؤں میں بغیر اطلاع پانی چھوڑنے کے باعث پاکستان میں شدید آبی بحران پیدا ہوگیا ہے، دریائے ستلج، راوی اور چناب میں اونچے درجے کا سیلاب ریکارڈ کیا گیا ہے۔
سیلاب کے نتیجے میں دریا کنارے کی درجنوں بستیاں زیر آب آ گئیں، ہزاروں ایکڑ پر کھڑی فصلیں تباہ ہوگئیں، جبکہ مختلف اضلاع میں ایمرجنسی نافذ کر دی گئی ہے۔
محکمہ موسمیات اور پی ڈی ایم اے کے مطابق ستلج میں گنڈا سنگھ والا کے مقام پر اونچے درجے کا سیلاب ہے جبکہ ہیڈ سلیمانکی پر درمیانے درجے کے ریلا کی اطلاع ہے۔
