پشاور: (دنیا نیوز) خیبر پختونخوا کابینہ کے 39 ویں اجلاس میں اہم فیصلے کئے گئے ہیں۔
مشیر اطلاعات تعلقات عامہ بیرسٹر ڈاکٹر سیف نے بتایا کہ کابینہ نے سرکاری کالجوں میں اساتذہ کی کمی پوری کرنے کے لئے عارضی بنیادوں پر بھرتی کی منظوری دیدی، فیصلے کی روشنی میں تین ہزار سے زائد اساتذہ بھرتی کئے جائیں گے۔
بیرسٹر ڈاکٹر سیف نے کہا کہ عارضی اساتذہ کی بھرتی پر سالانہ تین ارب روپے لاگت آئے گی، عارضی بھرتی کے لئے ایسوسی ایٹ ڈگری ہولڈر امیدوار بھی اہل ہونگے، کالج اساتذہ کی بھرتی کے عمل میں میرٹ اور شفافیت کو ہر لحاظ سے یقینی بنایا جائے۔
انہوں نے کہا کہ کابینہ نے وفاقی حکومت کی طرف سے غیر منقولہ جائیداد کے انتقال پر عائد فیڈرل ٹیکس کو عدالت میں چیلنج کرنے کی منظوری دیدی، غیر منقولہ جائیداد کے انتقال پر ٹیکس عائد کرنا صوبائی حکومت کا دائرہ اختیار ہے۔
بیرسٹر ڈاکٹر سیف کا کہنا تھا کہ کابینہ نے رضاکارانہ طور پر وطن واپس جانے والے افغان مہاجرین کو ٹرانسپورٹ کی سہولت فراہم کرنے کے لئے متعلقہ ڈپٹی کمشنرز کو ریلیف فنڈ سے رقم استعمال کرنے کی اجازت دیدی۔
انہوں نے کہا کہ سیاحت کے فروغ کے سلسلے میں سیاحتی مقامات میں انفراسٹرکچر کی بہتری، تزئین و آرائش اور صفائی کے لئے گلیات ڈویلپمنٹ اتھارٹی اور دیگر اتھارٹیز کو ایک ارب روپے گرانٹ ان ایڈ کی منظوری دی گئی۔
مشیر اطلاعات نے کہا کہ کابینہ نے سرکاری سکولوں میں انرولمنٹ کی شرح کو بڑھانے، تعلیم کے معیار کو بہتر کرنے کے لئے بعض سکولوں اور کالجوں کو پائلٹ بنیادوں پر آؤٹ سورس کرنے کی منظوری دے دی۔
بیرسٹر ڈاکٹر سیف نے کہا کہ ان سکولوں اور کالجوں کو آؤٹ سورس کیا جائے گا جن میں انرولمنٹ انتہائی کم ہو، آؤٹ سورسنگ سے ان تعلیمی اداروں میں تعینات اساتذہ کی ملازمت پر کوئی اثر نہیں پڑے گا، آؤٹ سورسنگ کے بعد بھی ان سکولوں میں تعلیم بالکل مفت فراہم کی جائے گی اور تمام اخراجات صوبائی حکومت برداشت کرے گی۔
انہوں نے بتایا کہ کابینہ نے جائیداد میں خواتین کے حقوق کے تحفظ کے لئے ویمن پراپرٹی رائٹس رولز 2025 کی منظوری دیدی، اجلاس میں ویمن کمیشن کے نئی چیئرپرسن اور ممبران کی تعیناتی کی منظوری دی گئی۔
مشیر اطلاعات تعلقات عامہ کا کہنا تھا کہ کابینہ نے ضلع پہاڑ پور، ضلع اپر سوات کے ناموں سے دو نئے اضلاع کے قیام کی منظوری دیدی، کابینہ نے خیبر پختونخوا ماؤنٹین ایگریکلچر پالیسی کی منظوری دیدی۔
بیرسٹر ڈاکٹر سیف نے کہا کہ خیبر پختونخوا ماونٹین ایگریکلچر پالیسی متعارف کروانے والا ملک کا پہلا صوبہ بن گیا، اجلاس میں فارمیسی سروسز پالیسی کی منظوری دیدی گئی، فارمیسی سروسز پالیسی ملک میں اپنی نوعیت کی پہلی پالیسی ہے۔
کابینہ نے شہری علاقوں میں شجرکاری کے سلسلے میں صوبائی دارالحکومت پشاور کے لئے 10 کروڑ، دیگر ڈویژنل ہیڈکوارٹرز کے لئے پانج، پانچ کروڑ روپے کی منظوری دیدی۔
انہوں نے کہا کہ کابینہ نے باجوڑ، تیراہ، کرم، وانا و دیگر اضلاع میں واقعات کے دوران شہداء کے لواحقین کے لئے خصوصی معاوضوں کی منظوری دی، اجلاس میں کینسر اور بون میرو کے دو مریضوں کے علاج معالجے کے لئے 45 لاکھ روپے کی بھی منظوری دی گئی۔
بیرسٹر ڈاکٹر سیف نے کہا کہ کابینہ نے صوبے کے مختلف بار ایسوسی ایشنز کے لئے گرانٹس ان ایڈ، صحت اور خصوصی بچوں کی تعلیم کے شعبوں میں کام کرنے والے تین غیر سرکاری تنظیموں کے لئے بھی چار کروڑ روپے گرانٹس ان ایڈ کی منظوری دیدی۔
اجلاس میں ڈبلیو ایس ایس سی ہری پور کے لئے گرانٹ ان ایڈ کی منظوری دی گئی، کابینہ اراکین، چیف سیکرٹری، ایڈیشنل چیف سیکرٹریز، متعلقہ انتظامی سیکرٹریز و ایڈووکیٹ جنرل نے اجلاس میں شرکت کی۔
