لاہور: (دنیا نیوز) پنجاب میں آوارہ کتوں کے بڑھتے حملوں اور ریبیز ویکسین کی عدم دستیابی پر ینگ ڈاکٹرز ایسوسی ایشن نے لاہور ہائیکورٹ سے رجوع کر لیا۔
ینگ ڈاکٹرز ایسوسی ایشن نے ایڈووکیٹ محمد اظہر صدیق کے توسط سے آئینی درخواست دائر کی جس میں شہریوں کو ریبیز ویکسین نہ ملنے اور حکومتی نااہلی کو چیلنج کیا گیا ہے۔
درخواست میں مؤقف اختیار کیا گیا کہ پنجاب بھر میں آوارہ کتوں کے حملوں میں خطرناک اضافہ ہو چکا ہے جبکہ ویکسین نہ ملنے سے شہریوں کے بنیادی حقوق، آئین کے آرٹیکل 9 اور 14 کے تحت زندگی اور انسانی وقار کے تحفظ کی خلاف ورزی ہو رہی ہے۔
درخواست گزار نے عدالت سے استدعا کی ہے کہ حکومت کو ABC پالیسی 2021 پر عملدرآمد کا پابند بنایا جائے اور تمام سرکاری ہسپتالوں میں ریبیز ویکسین کی فوری فراہمی کو یقینی بنایا جائے۔
درخواست میں مزید کہا گیا ہے کہ عوامی تحفظ اور انسانی وقار کے تحفظ کے لیے عدالتی مداخلت ناگزیر ہے اس لیے عدالت متعلقہ محکموں سے جواب طلب کرے اور ٹھوس اقدامات کا حکم جاری کرے۔
