لاہور: (دنیا نیوز) لاہور آج ایک بار پھر آلودہ ترین شہروں میں سرفہرست ہے، صوبائی دارالحکومت کا اوسط ایئر کوالٹی انڈیکس 266 تک پہنچ گیا جس کے پیش نظر پنجاب میں ایمرجنسی ایکشن پلان فعال کر دیا گیا ہے۔
صوبائی دارالحکومت میں عسکری 10 کے علاقے کا ایئر کوالٹی انڈیکس 414 ریکارڈ کیا گیا ہے جبکہ سید مراتب علی روڈ کے علاقے کا ایئر کوالٹی انڈیکس 424 اور ڈی ایچ اے کا ایئر کوالٹی انڈیکس 328 تک جا پہنچا ہے۔
بھارت میں دیوالی کے تہوار کے باعث آلودہ ہوائیں پنجاب کے مختلف شہروں میں داخل ہو رہی ہیں جس کے پیش نظر پنجاب میں ایمرجنسی ایکشن پلان فعال کر دیا گیا، ایمرجنسی ایکشن پلان کے تحت صوبے میں دھواں چھوڑنے والی گاڑیوں کے خلاف کریک ڈاؤن بھی جاری ہے، بغیر فٹنس سرٹیفکیٹ چلنے والی گاڑیوں کو فوری بند کیا جائے گا۔
دوسری جانب بھارت کا شہر نئی دہلی آج دنیا کا آلودہ ترین شہر قرار دے دیا گیا، دہلی کا اے کیو آئی 680 تک ریکارڈ کیا گیا ہے جبکہ دنیا کے آلودہ ترین شہروں میں لاہور دوسرے نمبر پر آ گیا ہے۔
نئی دہلی کی آلودگی کے باعث لاہور میں بھی دھند اور سموگ بڑھے گی، لاہور میں شدید سموگ کا خدشہ بڑھ گیا، شہریوں کو ماسک کے استعمال کی ہدایت کی گئی ہے جبکہ شدید دھند اور سموگ بڑھنے کے باعث سموگ مانیٹرنگ اینڈ کنٹرول سینٹر نے ایڈوائزری جاری کردی۔
