اسلام آباد: (دنیا نیوز) عالمی سطح پر پاکستان کی کامیاب حکومتی اور عسکری سفارت کاری کو بھرپور پذیرائی حاصل ہو رہی ہے۔
معروف امریکی جریدے فارن پالیسی نے اپنی تازہ رپورٹ میں پاکستان کو "خطے کا سفارتی فاتح" قرار دیتے ہوئے کہا ہے کہ اسلام آباد نے پچھلے چند ماہ میں متوازن اور مؤثر خارجہ پالیسی کے ذریعے عالمی منظرنامہ بدل دیا ہے۔
جریدے کے مطابق گزشتہ چھ ماہ میں پاکستان نے امریکا، چین، سعودی عرب، ترکیہ، ایران اور ملائیشیا کے ساتھ تعلقات میں نئے سنگِ میل قائم کیے ہیں جو ملک کی سفارتی بحالی اور مؤثر خارجہ حکمتِ عملی کا واضح ثبوت ہیں۔
فارن پالیسی نے اپنی رپورٹ میں انکشاف کیا کہ اسلام آباد نے امریکا سے تعلقات بحال کر کے خطے میں سفارتی توازن پیدا کیا، پاکستان کی جانب سے داعش خراسان کے دہشت گرد جو کابل ایئرپورٹ حملے کا ماسٹر مائنڈ تھا کی گرفتاری نے واشنگٹن میں اعتماد اور تعاون کا نیا باب کھولا۔
امریکی سینٹ کام کے سربراہ جنرل مائیکل کوریلا نے پاکستان کے انسدادِ دہشت گردی اقدامات کو "غیر معمولی اور مؤثر" قرار دیا، سعودی عرب سے اسٹریٹجک دفاعی معاہدہ نے خطے میں نئی سفارتی لہر پیدا کی، چین سے دفاعی اور اقتصادی تعاون میں توسیع نے بیجنگ-اسلام آباد تعلقات کو نئی بلندیوں پر پہنچا دیا۔
رپورٹ کے مطابق امریکا اور پاکستان کے بڑھتے تعلقات نے واشنگٹن اور نئی دہلی کے درمیان فاصلے پیدا کر دیئے ہیں، بھارت کو خدشہ ہے کہ ٹرمپ انتظامیہ کے پاکستان کی طرف جھکاؤ سے اس کی 25 سالہ سفارتی محنت ضائع ہو جائے گی۔
جریدے نے مزید لکھا کہ ٹرمپ اور مودی کی حالیہ تلخ فون کال کے بعد دونوں ممالک کے تعلقات میں کشیدگی پیدا ہوئی جس سے پاکستان کیلئے نئی راہیں کھل گئیں۔
رپورٹ کے مطابق فیلڈ مارشل عاصم منیر اور ٹرمپ کے درمیان جون میں ہونے والی دو گھنٹے طویل ملاقات نے دوطرفہ تعلقات میں نئی گرمجوشی پیدا کی جبکہ وزیراعظم شہباز شریف کی غزہ امن کانفرنس میں متحرک کردار اور امریکی سرمایہ کاری کے معاہدے پاکستان کی عالمی اثر و رسوخ میں اضافے کا ثبوت ہیں۔
فارن پالیسی نے یہ بھی لکھا کہ پاکستان نے ٹرمپ انتظامیہ سے شاندار تجارتی پیکیج حاصل کیا جس کے تحت ایک امریکی کمپنی نے 500 ملین ڈالرز کی سرمایہ کاری کا اعلان کیا ہے۔
رپورٹ کے اختتام پر جریدے نے کہا ہے کہ پاکستان نے غیر نیٹو اتحادی ہونے کے باوجود امریکا، چین اور سعودی عرب کے ساتھ بیک وقت تعلقات مستحکم کر کے سفارتکاری کا نیا باب رقم کیا ہے، اسلام آباد اب عالمی منظرنامے پر ایک اہم اور فعال کھلاڑی کے طور پر ابھر چکا ہے۔
