لاہور: (دنیا نیوز) پنجاب حکومت نے لاہور رنگ روڈ پر سفر کرنے والی گاڑیوں کی جدید نگرانی کے لیے کمانڈ اینڈ کنٹرول سینٹر قائم کرنے کا فیصلہ کر لیا۔
صوبائی وزیر تعمیرات و موصلات ملک صہیب احمد بھرتھ کی زیر صدارت اجلاس ہوا جس میں سیکرٹری سی اینڈ ڈبلیو سہیل اشرف، چیئرمین پنجاب رنگ روڈ اتھارٹی فیصل فرید اور دیگر متعلقہ محکموں کے افسران شریک ہوئے، اجلاس میں نے دے دی، اجلاس میں صوبائی وزیر کو کمانڈ اینڈ کنٹرول سینٹر کے حوالے سے تفصیلی بریفنگ دی گئی۔
ملک صہیب احمد بھرتھ کے مطابق کمانڈ اینڈ کنٹرول سینٹر سے رنگ روڈ سے گزرنے والی روزانہ ایک لاکھ پچاس ہزار گاڑیوں کی مانیٹرنگ کی جائے گی، ٹریفک مینجمنٹ کے ساتھ ساتھ ٹریفک قوانین کی خلاف ورزیوں پر بھی سخت نظر رکھی جائے گی۔
صوبائی وزیر نے بتایا کہ انٹیلیجنٹ ٹرانسپورٹ سسٹم کو کمانڈ اینڈ کنٹرول سینٹر سے منسلک کیا جائے گا جس کے تحت سپیڈ ریڈار، اے آئی کنٹرول کیمرے، ویٹ سٹیشن اور دورانِ ڈرائیونگ موبائل فون کے استعمال کی مانیٹرنگ ممکن ہوگی۔
انہوں نے مزید بتایا کہ کمانڈ اینڈ کنٹرول سینٹر رنگ روڈ اتھارٹی کے ہیڈ آفس میں قائم کیا جائے گا، جہاں 42 بڑی سکرینز اور 20 تجزیاتی سکرینز نصب کی جائیں گی۔
ملک صہیب احمد بھرتھ کے مطابق منصوبہ 871 ملین روپے کی لاگت سے چار ماہ میں مکمل کیا جائے گا اور یہ سینٹر رنگ روڈ اتھارٹی کے ایچ آر ڈیپارٹمنٹ سے آپریشنل ہو گا۔
