اسلام آباد:(دنیا نیوز) ملک میں مہنگائی کی لہر برقرار ہے، اشیاء خورونوش مزید مہنگی ہو گئیں۔
ادارہ شماریات نے ہفتہ وار بنیادوں پر مہنگائی کی رپورٹ جاری کردی جس کے مطابق مسلسل پانچویں ہفتے بھی مہنگائی میں اضافہ ہوا ہے اور شرح 0 اعشاریہ 12 فیصد مزید بڑھ گئی، ہفتہ وار مہنگائی کی مجموعی سالانہ شرح 5 اعشاریہ 05 فیصد ریکارڈ ہوئی۔
رپورٹ میں بتایا گیا کہ ایک ہفتے میں 14 اشیاء مہنگی، 10 کی قیمتوں میں کمی ہوئی، پیاز 64 روپے 97 پیسے فی کلو ، انڈے 10 روپے9 پیسے مہنگے ہوئے۔
اسی طرح ایک ہفتے میں برائلر مرغی 7 روپے 68 پیسے فی کلو مہنگی ہوئی، لہسن 7 روپے 18 پیسے مہنگا ہوگیا، اسی عرصے کے دوران 20 کلو آٹے کا تھیلا 7 روپے 92 پیسے، اڑھائی کلو گھی کا ٹن 5 روپے تک مہنگا ہوا۔
ادارہ شماریات کی رپورٹ میں بتایا گیا کہ دودھ، کیلے اور دہی بھی مہنگی ہونے والی اشیاء میں شامل ہیں جب کہ ٹماٹر 154 روپے 9 پیسے فی کلو سستے ہو گئے،دال چنا کی قیمت 4 روپے 94 پیسے کم ہوئی۔
دوسری جانب گزشتہ ہفتے دال مونگ 3 روپے 55 پیسے فی کلو سستی ہوئی، ایل پی جی سلنڈر،آلو، دال ماش ،چینی سستی ہونی والی اشیاء میں شامل ہے ، علاوہ ازیں گزشتہ ہفتے کے دوران 27 اشیاء کی قیمتوں میں استحکام رہا۔
