میڈرڈ: (دنیا نیوز) پاکستان کے نوجوان سکواش پلیئر حمزہ خان نے سپین میں جاری 15 ہزار ڈالرز انعامی رقم والے ویلینشیا اوپن سکواش کے کوارٹر فائنل کے لیے کوالیفائی کر لیا۔
حمزہ نے ٹورنامنٹ کے دوسرے راؤنڈ میں مصر کے پلیئر کو شکست دی، انہوں نے ایونٹ کے ابتدائی دونوں راؤنڈز کے میچز آدھے گھنٹے سے کم وقت میں جیتے۔
دوسرے راؤنڈ کے میچ میں حمزہ نے تھرڈ سیڈ مصر کے یاسین الشفیع کو 3-0 سے ہرایا، حمزہ نے یہ میچ صرف 29 منٹ میں 11-9، 11-3، 11-8 کے سکور سے اپنے نام کیا۔
اس سے قبل پہلے راؤنڈ میں حمزہ نے سپین کے ہوگو لوفینٹی کو صرف 27 منٹس میں شکست دی تھی، میزبان ملک کے پلیئر کے خلاف پہلے راؤنڈ میں حمزہ نے 11-9، 11-6، 11-5 سے میچ جیتا تھا۔
