وارسا: (ویب ڈیسک) نیدرلینڈزکے23 سالہ سائیکلسٹ اولاو کویج نے ٹور ڈی پولونے سائیکل ریس 2025ء کا پہلا مرحلہ جیت لیا۔
پولینڈ سے ٹورڈی پولونے سائیکل ریس کا 82 واں ایڈیشن شروع ہوچکا ہے جس میں دنیا بھر کی سائیکلنگ کی 22 ٹیموں کے نامور سائیکل سوار ٹائٹل کے حصول کے لئے کوشاں ہیں۔
ریس کے ابتدائی مرحلے میں سائیکل سواروں نے پولینڈ میں روٹ سواف سے لیگ نیٹ سا تک 199.7 کلومیٹر کا فاصلہ طے کرنا تھاجو سیدھے راستے پر محیط تھا۔
نیدرلینڈزکے 23 سالہ سائیکلسٹ اولاو کویج نے عمدہ سائیکلنگ کا مظاہرہ کرتے ہوئے فرانس کے حریف 21 سالہ پال میگنیئر کوشکست دیتے ہوئے پہلی پوزیشن حاصل کی، پال میگنیئر ریس میں دوسرے نمبر پر رہے جبکہ 25 سالہ آسٹریلوی سائیکل سوار جینسن پلو رائٹ نے تیسری پوزیشن حاصل کی۔
ریس کے ابتدائی مرحلے میں کامیابی کے ساتھ ساتھ نیدرلینڈز کے سائیکلسٹ اولاو کویج نے یلو جرسی بھی حاصل کی، یہ ریس 7 مرحلوں پر محیط ہے جس میں سائیکل سوار 1075.9 کلو میٹر کا سفر طے کریں گے، ریس 10 اگست کو اختتام پذیر ہوگی۔
