رابات: (ویب ڈیسک) شمالی کوریا کی خواتین فٹ بال ٹیم نے فٹبال کی تاریخ میں ایک نیا سنگ میل عبور کرتے ہوئے فیفا انڈر17 خواتین ورلڈ کپ جیت لیا، ٹیم نے یہ چوتھا ٹائٹل جیت کر عالمی ریکارڈ قائم کیا۔
فائنل میچ مراکش کے رابات اولمپک سٹیڈیم میں کھیلا گیا جہاں شمالی کوریائی کھلاڑیوں نے پہلے ہاف میں ہی 3 گول کر کے نیدرلینڈز کو 3 صفر سے شکست دی، جو اس ٹورنامنٹ میں پہلی بار شریک تھی۔
شمالی کوریا نے اس سے قبل 2008، 2016 اور 2024 میں بھی یہ ٹائٹل جیتا تھا اور وہ واحد ملک ہے جس نے 4 چیمپئن شپ جیتی ہیں۔
2024 کے بعد فیفا نے خواتین ورلڈ کپ ہر سال منعقد کرنے کا فیصلہ کیا، 2025 کے ٹورنامنٹ میں 24 ٹیمیں شریک ہوئیں، جن میں سے 4 ممالک پہلی بار میدان میں اترے، دفاعی چیمپئن شمالی کوریا نے فائنل تک پہنچنے سے پہلے میزبان مراکش کو 1-6، جاپان کو 1-5 اور سیمی فائنل میں برازیل کو 0-2 سے ہرایا۔
فائنل میں شمالی کوریائی ٹیم نے ابتدائی لمحے سے ہی جارحانہ حکمت عملی اپنائی اور ڈچ دفاع کو توڑ دیا، کم وون-سم نے 14ویں منٹ میں پہلا گول کیا۔
اس کے بعد پاک رئے یونگ نے دوسرا اور ری یوئی گیونگ نے ہاف ٹائم سے قبل تیسرا گول سکور کیا، یہ 0-3 کی فتح فائنل میں سب سے بڑی مارجن تھی اور شمالی کوریا کی خواتین یوتھ فٹبال میں بالادستی کو ثابت کرتی ہے۔
دوسری جانب انفرادی ایوارڈز میں بھی شمالی کوریائی کھلاڑیوں نے کامیابی حاصل کی، یو جونگ ہیانگ نے گولڈن بال جیت کر بہترین کھلاڑی کا اعزاز حاصل کیا اور گولڈن بوٹ جیت کر آٹھ گول کے ساتھ ٹاپ سکورر بھی بنیں، کم وون-سم نے سات گول کے ساتھ سلور بال اور سلور بوٹ حاصل کیا۔
