نیویارک: (ویب ڈیسک) واٹس ایپ کے بعد فیس بک نے صارفین کو محفوظ اور بہتر سہولت کی فراہمی کے لیے بھیجے گئے پیغامات کو حذف کرنے کے لیے ’اَن سینڈ ‘ فیچر متعارف کرنے کا فیصلہ کرلیا ہے۔ فیس بک صارفین غلطی سے بھیجے گئے پیغامات کو ’اَن سینڈ‘ آپشن کے تحت خود ڈیلیٹ کرسکیں گے۔
واٹس ایپ کےبعد فیس بک نے بھی بھیجے گئے پیغامات کو حذف کرنے کے لیے ایک نئے آپشن کی تیاری پر کام شروع کردیا ہے۔ اس سے قبل فیس بک پر پیغام رساں اپنے پاس سے تو میسیج کو ڈیلیٹ کرسکتا تھا لیکن پیغام وصول کرنے والے صارف کے پاس پیغام من و عن پہنچ جایا کرتا تھا اور اس وقت تک ڈیلیٹ نہیں ہو سکتا تھا جب تک وصول کنندہ خود اسے ڈیلیٹ نہیں کردیتا۔ جس پر فیس بک صارفین نے شکایات بھی درج کرائی تھیں تاہم اب صارفین کے لیے خوشخبری ہے کہ وہ اپنے غلطی سے بھیجے گئے پیغامات کو ’ان سینڈ‘ آپشن کے تحت خود ہی ڈیلیٹ کرسکیں گے۔
واضح رہے امریکی انتخابات میں صارفین کا ڈیٹا استعمال ہونے پر فیس بک کو مشکلات کو سامنا ہے جس کا سدباب کرنے اور صارفین کا اعتماد بحال کرنے کے لیے فیس بک مختلف نئے فیچرز پر کام کر رہی ہے۔ ان ہی تبدیلیوں کے تحت ’ان سینڈ‘ فیچر متعارف کرایا جا رہا ہے
