لاہور: (دنیا نیوز) سائنسدانوں کا کہنا ہے 2008 میں زمین کی فضا میں ہیروں سے لدی جو خلائی چٹان پھٹ گئی تھی وہ نظامِ شمسی کے ابتدائی دور کے ایک سیارے سے تعلق رکھتی تھی۔
جریدے نیچر کمیونیکیشنز میں شائع ایک تحقیق میں کہا گیا ہے یہ سیارہ اربوں برس پہلے نظامِ شمسی کا حصہ تھا اور کسی دوسرے سیارے سے ٹکرا کر تباہ ہو گیا۔ اس کا حجم عطارد یا مریخ جتنا تھا۔ سائنس دانوں نے جدید ترین خوردبینوں سے چٹان میں جڑے ہیروں کا جائزہ لیا۔ اس چٹان کے ٹکڑے شمالی سوڈان کے صحرائے نوبہ میں گرے تھے۔
سائنس دانوں کا کہنا ہے کہ کسی بڑے سیارے کے غائب ہونے کی یہ پہلی مدلل شہادت ہے۔ اس دریافت سے اس نظریے کو تقویت ملتی ہے کہ نظامِ شمسی ابتدا میں درجنوں سیاروں کا مسکن تھا، اور موجودہ سیارے انھی سیاروں کی باقیات سے مل کر بنے ہیں۔
