لاہور: (روزنامہ دنیا) جنگ، امن اور عام حالات میں ڈرون بڑی تعداد میں استعمال ہو رہے ہیں اور اب جنگوں میں ان کا عام استعمال شروع ہو گیا ہے اسی بنا پر ڈنمارک کی ایک کمپنی نے اب ڈرون کی شناخت اور اسے جام کرنیوالا ایک آلہ تیار کیا ہے جو دشمن کے ڈرون کو موثر انداز میں بے بس کرسکتا ہے اس سے قبل چھوٹے بڑے آلات کے ذریعے ڈرون کو جام کرنے کا کام لیا جاتا رہا ہے۔
سائنسدانوں نے اب دشمن ڈرون کیلئے لباس بھی تیار کر لیا ہے جسے گھنٹوں تک استعمال کیا جاسکتا ہے اسے 103 ڈرون ڈٹیکٹرکا نام دیا گیا ہے جس پر پِٹ بال ڈرون جیمر نصب کئے گئے ہیں، ڈرون جیمر کے اندر حساس انٹینا نصب ہیں، یہ جیمر 2.4 گیگا ہرٹز، 5.8 گیگا ہرٹز اور جی این ایس ایس (گلوبل نیوی گیشن سیٹلائٹ سسٹم) فریکوئنسی کو ایک کلومیٹر تک خارج کرتے ہیں۔
اضافی انٹینا لگانے سے یہ صلاحیت دو کلومیٹر تک بڑھائی جاسکتی ہے ۔یہ سگنل ہوا میں پھیلتے ہیں، دشمن ڈرون کی مواصلات میں خلل ڈالتے ہیں جس سے وہ کسی کام کا نہیں رہتا جبکہ دوست سپاہیوں کے وائرلیس رابطوں میں کسی قسم کا کوئی خلل پیدا نہیں ہوتا۔ دلچسپ بات یہ ہے کہ ڈرون جیمر کے ایک آلے کا وزن صرف 700 گرام ہے۔
