سیئول: (ویب ڈیسک) معروف موبائل فون کمپنی سام سنگ رواں سال گیلکسی ایس 10 صارفین کیلئے پیش کرے گی تاہم اسکے حوالے سے سامنے آنیوالی اطلاعات کے مطابق یہ کمپنی کا مہنگا ترین فون ثابت ہو سکتا ہے۔ انڈسٹری سے وابستہ تجزیہ کاروں کا اندازہ ہے کہ اس فون کا ایڈوانسڈ ورژن 1800 ڈالر یا پاکستانی اڑھائی لاکھ روپے میں دستیاب ہوگا اور اس کا کم قیمت ورژن گیلکسی ایس 10 لائٹ سوا لاکھ روپے میں مل سکے گا۔
میڈیا رپورٹ کے مطابق سام سنگ کے ایس ٹین میں 12 جی بی ریم اور ایک ٹیرابائٹ کی گنجائش رکھی گئی ہے جو کمپنی نے اس سے قبل کسی سمارٹ فون میں پیش نہیں کی۔ بعض تکنیکی ماہرین نے کہا ہے کہ ایک ٹیرابائٹ کی بجائے سام سنگ کے نئے ماڈل میں 6 سے 8 جی بی ریم اور 512 گیگا بائٹ کی گنجائش ہوگی۔
صارفین کیلئے ایک اور بات اہم ہے کہ سام سنگ کا پہلا فولڈنگ فون ’ گیلکسی ایف‘ اسی سال کے وسط میں لانچ کیا جائے گا جو گیلکسی فون سے ہٹ کر ہو گا۔ تاہم اگلے ماہ کی 20 تاریخ تک گیلکسی ایس 10 ریلیز ہونے کا قوی امکان ہے۔ دونوں سمارٹ فون میں بیزل ختم کر دیا گیا ہے اور سکرین کے پیچھے فرنٹ کیمرہ رکھا جائے گا۔ اس حوالے سے قیاس آرائیوں کے مطابق گیلکسی ایس 10 میں دو فرنٹ کیمرے لگائے جارہے ہیں جو ایک ساتھ تصویر لے کر مخصوص سافٹ ویئر کی مدد سے تھری ڈی ایفیکٹ جیسا تاثر پیدا کریں گے جو صارفین کیلئے انتہائی کشش کا باعث ثابت ہو گا۔
