اسلام آباد: (ویب ڈیسک) پاکستان ٹیلی کمیونی کیشن اتھارٹی نے سماجی رابطے کی ویب سائٹ ٹویٹر کی انتظامیہ کو ہدایت کی ہے کہ اعلیٰ عدلیہ کیخلاف توہین آمیز ٹویٹس اور ٹرینڈز کو فوری طور پر ہٹایا جائے۔
پاکستان ٹیلی کمیونی کیشن اتھارٹی (پی ٹی اے) کی جانب سے جاری نوٹی فیکیشن میں کہا گیا ہے کہ ٹویٹر انتظامیہ اس طرح کا مواد یا ٹرینڈز آزادی اظہار کی تعریف کے زمرے میں نہیں آتے، لہٰذا اسے فوری طور پر ہٹایا جانا چاہیے۔
Press Release: PTA has approached top management of micro blogging platform Twitter to immediately block/remove malicious trends and tweets vilifying superior judiciary. pic.twitter.com/HeQCX9RnP4
— PTA (@PTAofficialpk) April 12, 2021
پی ٹی اے کی جانب سے ٹویٹر کو یہ ہدایت بھی کی گئی ہے کہ اگر وہ قانونی کارروائی سے بچنا چاہتا ہے تو غیر قانونی اور نقصان دہ آن لائن مواد کو ہٹانے کیلئے قومی ادارے کی درخواستوں پر فوری اور موثر کارروائی عمل میں لائے۔
جاری نوٹی فیکیشن میں کہا گیا ہے کہ پاکستان ٹیلی کمیونی کیشن اتھارٹی (پی ٹی اے) تمام ڈیجیٹل پلیٹ فارمز کو معاونت اور سہولت فراہم کرنے کیلئے پرعزم ہے تاہم اس کیلئے بنیادی شرط یہی ہے کہ وہ ملکی قوانین پر عمل پیرا رہیں۔
