اسلام آباد: (دنیا نیوز) وزارت آئی ٹی اینڈ ٹیلی کام نے موبائل ورچوئل نیٹ ورک آپریٹرز فریم ورک کو حتمی شکل دے دی۔
وزارت آئی ٹی حکام کے مطابق فریم ورک سے ٹیلی کام سیکٹر میں سرمایہ کاری اور چھوٹے موبائل فون آپریٹرز لائسنسوں کے لیے راہ ہموار ہوگی، وزارت قانون و انصاف نے فریم ورک کا قانونی جائزہ مکمل کرلیا۔
حکام کے مطابق ایم وی این او فریم ورک منظوری کیلئے وفاقی کابینہ کو بھیجا جائے گا، ایم وی این او لائسنس کی فیس 50 لاکھ ڈالر سے کم کر کے 1.4 لاکھ ڈالر کر دی گئی، سرمایہ کاروں کی سہولت کے لیے لائسنس کی مدت 15 سال کر دی گئی۔
وزارت آئی ٹی حکام کا کہنا تھا کہ ایم وی این اوز کو ٹیلی کام آپریٹرز سے نیٹ ورک حاصل کرنا ہوگا، فریم ورک کے تحت ایم وی این او موبائل آپریٹر سے لائسنس لیز پر لے کر کام کر سکتا ہے، ایم وی این اوز اپنی برانڈنگ اور کسٹمر سروس خود چلائیں گی۔
حکام کے مطابق ایم وی این اوز کے لیے تجارتی معاہدے پی ٹی اے کی منظوری سے مشروط ہے، فریم ورک کا مقصد موبائل سروسز کی وسعت اور مسابقت میں اضافہ کرنا ہے، پی ٹی اے نے گزشتہ سال ایم وی این او فریم ورک تیار کیا تھا۔
وفاقی حکومت کی مںظوری کے بعد پی ٹی اے ایم وی این او کیلئے درخواستیں وصول کرنا شروع کرے گا، پی ٹی اے قانونی تقاصے پورے ہونے کے بعد ایم وی این او کو لائسنس جاری کرے گا۔
