کیلیفورنیا: (ویب ڈیسک) ویڈیو سٹریمنگ پلیٹ فارم یوٹیوب نے امریکا میں بچوں کی حفاظت کیلئے اے آئی کا استعمال کرنا شروع کر دیا۔
خبر رساں ادارے اے ایف پی کے مطابق یوٹیوب نے اپنے پلیٹ فارم پر بالغ ظاہر کرنے والے بچوں کی شناخت کیلئے مصنوعی ذہانت (اے آئی) کا استعمال کرنا شروع کر دیا ہے تاکہ حساس مواد سے نابالغ بچوں کو محفوظ رکھا جا سکے۔
یہ نئی حفاظتی تدبیر امریکا میں متعارف کرائی جا رہی ہے، کیونکہ گوگل کی ملکیت والی یوٹیوب اور دیگر سوشل میڈیا پلیٹ فارمز جیسے انسٹاگرام اور ٹک ٹاک پر نابالغ بچوں کو بالغوں کیلئے مخصوص مواد سے محفوظ رکھنے کیلئے کڑی نگرانی کی جا رہی ہے۔
یوٹیوب کے یوتھ ڈائریکٹر برائے پروڈکٹ منیجمنٹ جیمز بیسر کے مطابق مشین لرننگ کے نام سے مشہور اے آئی کے ایک ورژن کو صارفین کی عمر کا اندازہ لگانے کیلئے استعمال کیا جائے گا، جس میں مختلف عوامل جیسے دیکھی جانے والی ویڈیوز کی نوعیت اور اکاؤنٹ کی مدت شامل ہیں۔
بیسر نے کہا کہ یہ ٹیکنالوجی ہمیں صارف کی عمر کا اندازہ لگانے کی اجازت دے گی اور پھر اس سگنل کو استعمال کرتے ہوئے، چاہے اکاؤنٹ میں پیدائش کا دن کچھ بھی ہو صارف کو اس کی عمر کے مطابق مصنوعات اور حفاظتی تجربات فراہم کئے جائیں گے، ہم نے اس طریقے کو دیگر مارکیٹس میں کچھ عرصے تک استعمال کیا ہے، جہاں یہ اچھی طرح کام کر رہا ہے۔
یوٹیوب کے مطابق عمر کا اندازہ لگانے والا یہ ماڈل پہلے سے موجود ٹیکنالوجی کو بہتر بناتا ہے جو صارف کی عمر کا تعین کرتی ہے۔
اگر یوٹیوب کو لگے کہ صارف نابالغ ہے، تو اسے اطلاع دی جائے گی اور اس کے پاس اپنی عمر کو تصدیق کرنے کا آپشن ہوگا، جس کیلئے کریڈٹ کارڈ، سیلفی یا حکومتی شناختی کارڈ استعمال کیا جا سکتا ہے۔
واضح رہے کہ سوشل میڈیا پلیٹ فارمز اکثر نابالغ بچوں کی حفاظت کرنے میں ناکامی پر تنقید کا نشانہ بنتے رہتے ہیں۔
