نیویارک: (ویب ڈیسک) انسٹنٹ میسیجنگ ایپلی کیشن واٹس ایپ پر ایک نئے فیچر کی آزمائش کی جا رہی ہے جو وائس میل سے ملتا جلتا ہے، جس سے صارفین مس کالز کے بعد فوری آڈیو پیغامات بھیج سکیں گے۔
کچھ عرصہ قبل رپورٹس میں بتایا گیا تھا کہ واٹس ایپ ایک ایسے فیچر پر کام کر رہا ہے جو صارفین کو ان کالز کی یاد دہانی کرائے گا جو وہ کسی وجہ سے سن نہ پائیں۔
اب واٹس ایپ کی اپڈیٹس پر نظر رکھنے والی ویب سائٹ نے بتایا ہے کہ واٹس ایپ نے مس کالز کیلئے وائس میل جیسے فیچر کی آزمائش شروع کر دی ہے، فیچر کے تحت جب کوئی صارف کسی کو واٹس ایپ پر کال کرے گا اور وہ جواب نہ دے سکے گا تو ایپ کے کالنگ انٹرفیس میں ’ریکارڈ وائس میسج‘ کا ایک شارٹ کٹ بٹن نظر آئے گا، جو کال اگین اور کینسل بٹنوں کے ساتھ ہوگا۔
مذکورہ آپشن اس فرد کے ساتھ چیٹ میں بھی دکھائی دے گا جہاں مس کال کا نوٹیفکیشن موجود ہوگا، اس شارٹ کٹ کے ذریعے صارفین اس شخص کو فوری طور پر آڈیو پیغام بھیج سکیں گے جس نے کال کا جواب نہیں دیا۔
اگرچہ واٹس ایپ میں پہلے سے ہی وائس نوٹ ریکارڈ کرنے کی سہولت موجود ہے، لیکن یہ نیا فیچر مس کال کے فوراً بعد وائس میسج بھیجنے کے عمل کو مزید آسان اور فوری بناتا ہے۔
