اسلام آباد: (ویب ڈیسک) پاکستان نے آئی ٹی کی دنیا میں شاندار سنگ میل عبور کرلیا۔
خصوصی سرمایہ کاری سہولت کونسل (ایس آئی ایف سی) کے ساز گار ماحول کی بدولت پاکستان کے آئی ٹی سیکٹر میں اہم پیشرفت ہوئی ہے۔
2024 میں پاکستانی اپلیکیشن ڈویلپر نے 1,053 موبائل ایپلیکیشنز کی کامیاب لانچنگ کا ایک بڑا سنگ میل عبور کر لیا، پاکستان کا خطے میں ابھرتا ہوا موبائل ایپلیکیشن ڈویلپر حب بننا آئی ٹی کے شعبے کی شاندار کامیابی ہے۔
پاکستانی موبائل ایپلیکیشنز کی اینڈرائیڈ اور آئی او ایس پلیٹ فارمز پر عالمی مانگ میں اضافہ ہوا ہے جو پاکستانی ایپلیکیشن ڈویلپرز کی عالمی پذیرائی کا ایک ثبوت ہے۔
سال 2024 میں پاکستانی ڈویلپرز کی جانب سے 764 اینڈرائیڈ اور 289 آئی او ایس ایپلیکیشنز کا اجراء کیا گیا، پاکستان نے فلپائن، انڈونیشیا، میکسیکو اور مصر جیسے ممالک کو پیچھے چھوڑتے ہوئے آئی ٹی سیکٹر میں نیا عالمی مقام حاصل کیا۔
پاکستانی موبائل ایپلیکیشنز کی عالمی مقبولیت کی بدولت غیر ملکی سرمایہ کاروں کا اعتماد بحال ہوا ہے، ایس آئی ایف سی کی پالیسیز پاکستان کے آئی ٹی سیکٹر میں سرمایہ کاری اور ترقی کو تیز رفتار بنانے میں کلیدی کردار ادا کر رہی ہیں۔
