ولنگٹن: (ویب ڈیسک) دنیا بھر میں کورونا وائرس کی بڑھتی ہوئی تعداد کے بعد جہاں پر خوف کا عالم چھایا ہوا ہے وہیں پر نیوزی لینڈ سے ایک انوکھی خبر نے سب کو ششدر کر دیا ہے، نیوزی لینڈ میں کورونا ٹیسٹنگ ٹینٹ چوری کر لیے جس کے بعد پولیس نے چوروں سے اپیل کی ہے کہ اپنے ٹیسٹ کروائیں۔
خبر رساں ادارے اے ایف پی کے مطابق نیوزی لینڈ کے شہر آکلینڈ میں ایک انوکھی واردات کے دوران چوروں نے ہسپتال کے باہر کورونا وائرس ٹیسٹنگ کے لیے لگایا گیا ٹینٹ چرا لیا ہے۔
تاہم پولیس نے خبردار کیا ہے کہ ان چوروں میں کووڈ 19 کی تشخیص ہونے کا امکان ہے اس لیے انھیں چاہیے کہ وہ اپنے ٹیسٹ کروا لیں۔
پولیس کی جانب سے فیس بک پر پوسٹ کی گئی ویڈیو میں بتایا گیا ہے کہ ہسپتال کے باہر شہر کے باسیوں کی ٹیسٹنگ کے لیے ٹینٹ لگایا گیا تھا اور ہسپتال کے عملے کو اس کی چوری کے حوالے سے آج صبح ہی معلوم ہوا ہے۔
ایسٹ ہیلتھ ٹرسٹ نامی ہسپتال کی چیف کا کہنا تھا کہ کسی بیوقوف نے ہمارا کووڈ 19 ٹیسٹ چرا لیا ہے، اسے کنکریٹ میں میخیں لگا کر نصب کیا گیا تھا اور وہ اسے اکھاڑ کر لے گئے۔
پولیس کا کہنا ہے کہ جس نے بھی یہ ٹینٹ چوری کیا ہے وہ نام نہ ظاہر کر کے ہمیں اس کے بارے میں اطلاع دے اور اپنا کورونا وائرس ٹیسٹ کروا لے۔
