نئی دہلی: (ویب ڈیسک) بھارتی ریاست اتر پردیش میں شوہر نے ناراض ہو کر میکے میں رہنے والی بیوی کو مٹی کا تیل چھڑک کر زندہ جلادیا جبکہ سسر کو سر پر اینٹ مار کر قتل کردیا۔
بھارتی میڈیا کے مطابق سفاک شوہر نے بیوی اور سسر کو بیدردی سے قتل کرنے کے بعد اپنے دو چھوٹے بچوں کا گلا دبا کر مارنے کی کوشش کی لیکن بڑی بیٹی نے اپنے دونوں چھوٹے بہن بھائیوں کو بچالیا۔
بڑی بیٹی نے پولیس کو فون کرکے اپنے باپ کے قتل کی واردات کے بارے میں بتایا تاہم پولیس کے پہنچنے سے قبل ملزم نے خود کو بھی گولی مار کر اپنی زندگی کا خاتمہ کرلیا۔
پولیس کا کہنا ہے کہ مقتولہ 39 سالہ انوسیا اپنے 42 سالہ شوہر اوم پرکاش سے ناراض ہوکر اپنے باپ کے زیر تعمیر ایک گھر میں دو ماہ سے رہ رہی تھی اور شوہر اپنے دوست کے ہمراہ بیوی کو منانے پہنچا تھا۔
دوست کی ضمانت پر سسر اور بیوی نے اوم پرکاش کی بات مان لی اس کے بعد دوست واپس چلا گیا اور اوم پرکاش نے کہا میں رات یہی ٹھہروں گا لیکن جیسے ہی دوست اور سسر گھر سے نکلے اس نے جھگڑا شروع کردیا۔
بیٹی نے پولیس کو بتایا کہ باپ نے پہلے والدہ کو آگ لگادی جس پر میں چیخی تو نانا اور ابو کے دوست واپس آگئے، نانا نے امی کو بچانے کی کوشش کی تو ابو نے انھیں قتل کردیا۔
پولیس کو دیئے گئے بیان میں بیٹی نے مزید بتایا کہ ابو نے اس پر ہی بس نہیں کیا بلکہ میرے دو چھوٹے بہن بھائیوں کو گلا دبا کر مارنے کی کوشش کی جنھیں میں چھڑانے میں کامیاب ہوگئی اور پولیس کو کال کی۔
