ریاض: (ویب ڈیسک) سعودی عرب نے رمضان میں 45 ممالک میں قرآن پاک کے 12 لاکھ نسخے تقسیم کرنے کا اعلان کر دیا۔
سعودی میڈیا کی رپورٹ کے مطابق سعودی حکومت نے ماہِ رمضان کے بابرکت اور مقدس مہینے کے شایان شان استقبال کے لئے متعدد اقدامات کی منظوری دی ہے، سعودی فرمانروا شاہ سلمان بن عبدالعزیز نے دنیا کے 45 ممالک میں قرآن پاک کے 12 لاکھ نسخے بھیجنے کی منظوری دی ہے۔
سعودی میڈیا نے مزید بتایا کہ قرآن مجید کے ان نسخوں کی تقسیم مملکت کے اسلامی و ثقافتی مراکز اور سعودی سفارت خانوں کے ذریعے کی جائے گی، قرآن پاک کے دیدہ زیب نسخے ایک خاص ایڈیشن ہیں جو شاہ سلمان کی جانب سے دنیا بھر کے مسلمانوں کے لئے تحفہ ہیں۔
ان نسخوں کی جدید ٹیکنالوجی کی مدد سے نہایت مہارت اور کاریگری کے ساتھ طباعت کی گئی ہے، سعودی حکام کا کہنا ہے کہ قرآن پاک کے ان نسخوں کی دنیا بھر کے ممالک میں ترسیل کے انتظامات مکمل کر لئے گئے ہیں۔
