واشنگٹن: (دنیا نیوز) امریکی عدالت نے ٹرمپ انتظامیہ کو وفاقی ملازمین کی برطرفی سے عارضی طور پر روک دیا۔
غیر ملکی میڈیا کے مطابق وفاقی عدالت کے جج نے پرسنل مینجمنٹ سے متعلق دفتر کو حکم دیا ہے کہ وہ پروبیشنری سرکاری ملازمین کی چھانٹیوں سے متعلق 20 سے زائد اداروں کو جاری احکامات منسوخ کرے۔
جج نے کہا کہ کانگریس نے محکمہ دفاع سمیت مختلف اداروں کو اختیار دیا ہےکہ وہ ملازمین کوبھرتی یا برطرف کریں،اس لیے پرسنل مینجمنٹ کے دفتر کو کسی صورت بھی یہ اختیار نہیں کہ وہ کسی دوسرے ادارے کے اہلکاروں کو نوکری دے یا فارغ کردے۔
امریکی وفاقی جج نے کہا کہ مختلف اداروں میں ملازمین کی برطرفی ممکنہ طور پر غیرقانونی ہے۔
واضح رہے کہ امریکا میں تقریباً 2 لاکھ ملازمین پروبیشنری ملازم ہیں۔
امریکی میڈیا کے مطابق مختلف محکموں سے ہزاروں پروبیشنری ملازمین کو پہلے ہی نوکریوں سے نکالا جا چکا ہے۔
خیال رہے کہ لیبریونین نے سان فرانسسکو کی عدالت سے استدعاکی تھی کہ ملازمین کے خلاف یہ اقدام ممکنہ طورپر غیر قانونی ہے، یونین کا کہنا تھا کہ ایسے ملازمین بھی فارغ کردیئے گئے ہیں جن کے سینئرز نے انہیں بہترین ملازم قرار دیا تھا۔
