واشنگٹن: (ویب ڈیسک)امریکہ میں 15 سالہ طالبعلم سے جنسی تعلقات استوار کرنے والی خاتون ٹیچر پکڑی گئی۔
عالمی میڈیا کی رپورٹ کے مطابق کرسٹینا فارمیلا نے 2017ء میں ٹیچنگ لائسنس حاصل کیا تھا اور 2020ء سے سکول سے منسلک تھی، انہوں نے سکول میں 2021ء سے بطور فٹ بال کوچ طلبا کے لئے رضا کارانہ خدمات انجام دیں۔
15 سالہ طالب علم کی والدہ نے تھانے میں رپورٹ درج کرائی کہ انہوں نے بیٹے کے موبائل پر ٹیچر کے نازیبا پیغامات دیکھے ہیں، والدہ کا بیان میں مزید کہنا تھا کہ سکول ٹیچر نے متعدد بار بیٹے کے ساتھ جنسی تعلق استوار کئے ہیں۔
پولیس نے ٹھوس شواہد ملنے پر سکول ٹیچر کو اس وقت کار سے گرفتار کیا جب وہ اپنے شوہر کے ساتھ کسی مسئلے پر بحث کر رہی تھی، پولیس کو دیئے گئے بیان میں استانی نے طالب علم کو قصور وار ٹھہراتے ہوئے کہا کہ نازیبا میسجز اسی نے پہلے میرے فون سے اپنے نمبر پر کئے تھے۔
سکول ٹیچر نے اپنے بیان میں مزید بتایا کہ طالب علم اس جھوٹی چیٹ کی بنیاد پر مجھے بلیک میل کرتا رہا ہے اور جب میں نے منع کیا تو میرے خلاف کیس کردیا، ٹیچر نے پولیس کو بتایا کہ میں خوبصورت ہوں اور جاذب نظر ہونا ہی میری غلطی ہے، یہ لڑکا بھی خود میرے پیچھے لگا تھا۔
سکول ٹیچر کا مزید کہنا تھا کہ میرے ساتھ ہمیشہ سے یہی مسئلہ رہا ہے لوگ میری خوبصورتی سے متاثر ہوکر تعلقات استوار کرنے کے لئے ایسے ہی ہتھکنڈے استعمال کرتے ہیں۔
پولیس نے سکول ٹیچر کا بیان ریکارڈ کرنے کے بعد اس شرط پر ضمانت پر رہا کردیا کہ وہ سکول میں کسی بھی 18 سال سے کم عمر طالب علم سے بات چیت نہیں کریں گی، علاوہ ازیں سکول ٹیچر پر کیس کا فیصلہ ہونے تک عوامی مقامات پر بھی 18 سال سے کم عمر بچوں سے بات چیت پر پابندی ہوگی۔
کیس کی سماعت کے لئے سکول ٹیچر کو 14 اپریل کو پیش ہونے کا حکم دیا گیا ہے۔
