اسلام آباد: (دنیا نیوز) اسرائیل کے بعد بھارت اور افغان طالبان کے درمیان گٹھ جوڑ بے نقاب ہوگیا، سابق افغان جنرل نے بھارت کی جانب سے پاکستان میں دہشت گردوں کی پشت پناہی کا انکشاف کر دیا۔
ذرائع کے مطابق افغان فوج کے سابق ڈائریکٹر ملٹری انٹیلیجنس اور سپیشل آپریشنز فورسز کے کمانڈر لیفٹیننٹ جنرل سید سمیع سادات نے کہا کہ افغان طالبان بھارت سے مالی امداد لے کر پاکستان میں دہشتگردوں کی پشت پناہی کر رہے ہیں۔
سابق جنرل سمیع سادات نے انکشاف کرتے ہوئے کہا کہ افغان طالبان پاکستان مخالف گروہوں کو سپورٹ کرتے ہیں، افغان طالبان کے بھارت سے قریبی تعلقات قائم ہیں، طالبان کو بھارت سے مالی امداد ملتی ہے، جو فتنہ الخوارج (ٹی ٹی پی) اور بلوچ علیحدگی پسند گروہوں کو دی جاتی ہے۔
ان کا مزید کہنا تھا کہ طالبان اُن گروہوں کوفنڈنگ کرتے ہیں جو پاکستان میں دہشت گرد حملوں میں ملوث ہیں۔
سابق افغان جنرل کا یہ اعتراف وزیر دفاع خواجہ آصف کے بیان کی تصدیق کی ہے کہ افغان طالبان بھارت کے ساتھ مل کر پاکستان مخالف سرگرمیوں میں ملوث ہیں۔
افغان جنرل کا بیان پاکستان کے مؤقف کی تصدیق ہے کہ خطے میں دہشتگردی افغان طالبان اور بھارت کے گٹھ جوڑ کا نتیجہ ہے۔
