برسلز: (ویب ڈیسک) یورپی ممالک نے امریکا اور روس کے درمیان مذاکرات میں یوکرین کو بھی شامل کر نے کا مطالبہ کیا ہے۔
عالمی میڈیا کی رپورٹ کے مطابق یوکرین کے یورپی اتحادی ممالک نے اس بات پر اصرار کیا ہے کہ روس کے ساتھ کسی بھی امن مذاکرات میں یوکرین کو بھی شامل کرنا چاہیے، یہ مطالبہ ایک ایسے وقت پر سامنے آیا ہے جب امریکی صدر ڈونلڈ ٹرمپ 15 اگست کو الاسکا میں روسی صدر ولادیمیر پیوٹن کے ساتھ ملاقات کرنے والے ہیں۔
برطانیہ، فرانس، اٹلی، جرمنی، پولینڈ، فن لینڈ اور یورپی کمیشن کے رہنماؤں کی طرف سے جاری مشترکہ بیان میں کہا گیا ہے کہ یوکرین میں امن کا راستہ یوکرین کے بغیر طے نہیں کیا جا سکتا۔
صدر ولادیمیر زیلنسکی نے اس بارے کہ یوکرین کو اس کے اپنے امن مذاکرات میں مدعو نہیں کیا جائے گا پر تشویش کا اظہار کرتے ہوئے کہا کہ یوکرین کے بغیر کوئی بھی معاہدہ مردہ فیصلے کے مترادف ہوگا۔
واضح رہے کہ وائٹ ہاؤس کے ایک اہلکار نے کہا کہ صدر ڈونلڈ ٹرمپ روسی صدر ولادی میر پیوٹن اور یوکرین کے صدر ولودیمیر زیلنسکی دونوں کے ساتھ سہ فریقی میٹنگ کرنے کے لیے تیار ہوں گے لیکن فی الحال 15 اگست کو صرف دو رہنماؤں کے درمیان ہی ملاقات ہو گی جیسا کہ روسی صدر نے درخواست کی تھی۔
صدر ٹرمپ نے پہلے مشورہ دیا تھا کہ وہ صرف روسی صدر سے ملاقات کرکے شروعات کر سکتے ہیں۔
