تل ابیب: (ویب ڈیسک) اسرائیلی اساتذہ، دانشوروں، سابق فوجیوں کے بعد اسرائیلی فضائیہ کے پائلٹوں نے بھی غزہ جنگ بندی کا مطالبہ کردیا۔
اسرائیلی میڈیا کے مطابق تل ابیب میں اسرائیلی فضائیہ کے پائلٹوں اور ریزرو اہلکاروں نے فوجی ہیڈکوارٹرز کے باہر احتجاجی مظاہرہ کیا، اسرائیلی پائلٹوں اور ریزرو فوجیوں نے غزہ میں جاری جنگ روکنے کا مطالبہ کیا، مظاہرین نے غزہ پر حملے بڑھانے کے منصوبے کی بھی مخالفت کی۔
واضح رہے کہ غزہ پر اسرائیلی فوج کے وحشیانہ حملوں میں صبح سے اب تک مزید 89 سے زائد فلسطینی شہید ہو گئے ہیں جبکہ بھوک کی شدت سے دو بچوں سمیت پانچ اور فلسطینی انتقال کر گئے۔
غذائی قلت سے اموات 227 ہو گئیں جن میں 103 بچے بھی شامل ہیں۔
برطانیہ، فرانس سمیت ستائیس یورپی ممالک کے وزرائے خارجہ کا کہنا ہے کہ غزہ میں انسانی بحران ناقابل تصور حدوں تک پہنچ گیا ہے، اسرائیل بلا رکاوٹ اور محفوظ امداد فراہمی کے لیے بین الاقوامی اداروں کو رسائی دے۔
