فینکس: (دنیا نیوز) امریکی ریاست ایریزونا کی فضا میں گرد و غبار کا شدید طوفان، ہر منظر دھندلا گیا۔
خبرایجنسی کے مطابق ہبوب طوفان نے پینال کاؤنٹی سے لے کر فینکس شہر تک آسمان کو سیاہ کر دیا، ہبوب طوفان کی وجہ سے ہوائیں 100 کلومیٹر فی گھنٹہ کی رفتار سے چلنے لگیں۔
گرج چمک والے طوفان کے بعد تیز ہواؤں نے ریگستانی ریت کو گرد و غبار کے طوفان میں بدل دیا، حدِ نگاہ 50 فٹ سے بھی کم ہونے سے ڈرائیور حضرات کیلئے شدید خطرناک صورتحال پیدا ہو گئی۔
خبر ایجنسی کے مطابق فینکس ایئرپورٹ پر پروازیں شدید متاثر، ٹرمینل 4 کو جزوی نقصان پہنچا، کئی فلائٹس تاخیر کا شکار ہیں، 50 ہزار سے زائد گھر اور کاروباری مراکز بجلی سے محروم ہو گئے۔
طوفان کے باعث درخت اکھڑ گئے، ٹریفک سِگنلز بند، کئی سڑکیں جزوی طور پر بلاک ہو گئیں، شہر میں ایمرجنسی نافذ کر دی گئی، نیشنل ویدر سروس نے مزید طوفان، گرج چمک اور شدید بارش کی پیشگوئی کر دی۔
ہبوب طوفان کے باعث شہریوں کو سانس لینے میں دشواری کا سامنا ہے، ماہرین نے ماسک پہننے اور سفر سے گریز کا مشورہ دیا ہے۔
ماہرین موسمیات کے مطابق جنوب مغربی امریکا میں موسمِ گرما کے مون سون کے دوران ہبوب طوفان عام بات ہے۔
