کیف: (ویب ڈیسک) یوکرینی صدر اپنے روسی اور امریکی ہم منصب کے ساتھ بداپسٹ سمٹ میں شرکت کیلئے تیار ہوگئے۔
عالمی میڈیا کی رپورٹ کے مطابق یوکرین کے صدر ولودیمیر زیلنسکی نے میڈیا سے گفتگو کرتے ہوئے کہا ہے کہ اگر انہیں دعوت دی جاتی ہے تو وہ روسی صدر ولادیمیر پیوٹن اور امریکی ہم منصب ڈونلڈ ٹرمپ کے ساتھ ہنگری میں ہونے والے اجلاس میں شرکت کے لئے تیار ہیں۔
انہوں نے کہا کہ اگر مجھے بداپسٹ ااجلاس میں مدعو کیا جاتا ہے، اگر یہ ایسی دعوت ہے جس میں ہم تینوں ایک ساتھ ملاقات کرتے ہیں یا جیسا کہ اسے شٹل ڈپلومیسی کہا جاتا ہے یعنی صدر ٹرمپ الگ الگ روسی صدر اور مجھ سے ملتے ہیں تو ہم کسی نہ کسی فارمیٹ میں اتفاق کر لیں گے۔
یوکرینی صدر نے اجلاس کے مقام کے انتخاب پر تنقید کرتے ہوئے کہا کہ ہنگری اور یوکرین کے درمیان تعلقات کشیدہ ہیں اور یورپی یونین کے اندر ہنگری کی حکومت ماسکو کی سب سے ہمدرد حکومت سمجھی جاتی ہے۔
رپورٹ میں بتایا گیا ہے کہ انہوں نے ہنگری کے وزیرِاعظم وکٹر اوربان کے حوالے سے کہا کہ میں نہیں سمجھتا کہ ایک ایسا وزیرِاعظم جو ہر موقع پر یوکرین کی راہ میں رکاوٹ بنتا ہے یوکرینی عوام کے لئے کچھ مثبت کر سکتا ہے یا متوازن کردار ادا کر سکتا ہے۔
یوکرینی صدر نے مزید کہا کہ ایک اور بداپسٹ جیسا منظرنامہ ہمارے لئے مثبت ثابت نہیں ہوگا، 1994ء میں روس نے بداپسٹ میں ایک یادداشت پر دستخط کئے تھے جس کے تحت سوویت دور کے جوہری ہتھیاروں سے دستبرداری کے بدلے یوکرین، بیلاروس اور قازقستان کو سلامتی کی ضمانت دی گئی تھی۔
