کراچی (دنیا نیوز ) رواں مالی سال کے دس ماہ میں سیمنٹ کی کُل کھپت 3 کروڑ 89 لاکھ ٹن تک پہنچ گئی، سی پیک کی بدولت ترقیاتی کاموں میں تیزی آگئی، یہی وجہ ہے کہ مالی سال 2018 کے دس ماہ کے دوران سیمنٹ کی کُل کھپت 15 فیصد اضافے سے 3 کروڑ 89 لاکھ ٹن تک پہنچ گئی۔
آل پاکستان سیمنٹ مینوفیکچرز ایسوسی ایشن کے تازہ ترین اعداد و شمار کے مطابق جولائی سے مارچ کے دوران سیمنٹ کی مقامی کھپت 17 فیصد اضافے سے 3 کروڑ 50 لاکھ ٹن رہی جبکہ گذشہ مالی سال انہی دس ماہ کے دوران 2 کروڑ 98 لاکھ ٹن سیمنٹ فروخت ہوئی تھی۔
دس ماہ کے دوران سیمنٹ کی برآمدات 2 فیصد کمی کے بعد 39 لاکھ ٹن رہی، معاشی تجزیہ کاروں کے مطابق پاک چین اقتصادی راہ داری منصوبے کی بدولت ملک میں کئی ترقیاتی منصوبوں پر کام کا آغاز ہوچکا ہے جس کے باعث مقامی سطح پر سیمنٹ کی کھپت میں مسلسل اضافے کا رجحان جاری ہے۔
