اسلام آباد: (دنیا نیوز) ای او بی آئی پنشنرز کی سنی گئی اور یکم مئی سے پنشن میں اضافے کا اعلان کر دیا گیاہے۔
گزشتہ روز چیئرمین جنید اکبر کی زیرصدارت پبلک اکاؤنٹس کمیٹی کا اجلاس ہوا، اجلاس میں وزارت اوورسیزپاکستانی کے آڈٹ پیراز اور وزارت کے مالی سال 2022-23 کے 11 آڈٹ پیراز کا جائزہ لیا گیا۔
حکام کااس موقع پر کہنا تھا کہ ای او بی آئی نے 2 ارب 79 کروڑ روپے کی فیک پنشنرز کو ادائیگی کی، ای او بی آئی کے فنڈ کی مالیت 600 ارب روپے ہے۔
حکام کا کہنا تھا کہ ایک کروڑ کاروبارہیں 10 ملازمین والے ادارے کوپنشن فنڈمیں شامل کیا جاتا ہے، آڈٹ میں الزام لگایا گیا ہے کہ ملازمین کی عمر میں تبدیلی کر کے 5 ہزار افراد کو پنشن دی گئی۔
ای او بی آئی حکام نے اکاؤنٹس کمیٹی اجلاس میں بتایا کہ ہمارا محکمہ 1976ء سے قائم ہے اور نادرا سے پہلے کا ہے، شناختی کارڈ کی تاریخ پیدائش کے سوا ہم دیگر ذرائع سے بھی عمر چیک کرتے ہیں۔
ای او بی آئی بورڈ آف ٹرسٹیز نے کم از کم پنشن 10 ہزار سے بڑھا کر 11ہزار 500 کردی، 10 ہزار سے زائد پنشن لینے والوں کی پنشن میں 15 فیصد اضافہ کیا گیا، پنشن میں اضافے کا اطلاق یکم جنوری 2025 سے ہوگا۔
تقریباً 5 لاکھ پنشنرز کو اضافے کا فائدہ پہنچے گا، پنشن میں اضافے کا باقاعدہ اعلان یوم مزدور کے موقع پر کئے جانے کا امکان ہے، ای او بی آئی میں صرف 38 فیصد منظور شدہ عملہ تعینات، بھرتیوں کا عمل تیز، نئے افسران جلد ادارے میں شامل ہوں گے۔
