اسلام آباد:(دنیا نیوز) ملک میں مہنگائی کی شرح میں مسلسل دوسرے ہفتے بھی اضافہ ہوا۔
ادارہ شماریات نے ہفتہ وار مہنگائی سے متعلق تازہ رپورٹ جاری کر دی، جس کے مطابق ہفتہ وار بنیادوں پر مہنگائی کی شرح صفر اعشاریہ 95 فیصد بڑھ گئی اور ملک میں مہنگائی بڑھنے کی سالانہ شرح منفی 1 اعشاریہ 23 فیصد ریکارڈ ہوئی۔
رپورٹ میں یہ بتایا گیا ایک ہفتے کے دوران 19 اشیاء ضروریہ مہنگی،صرف 6 کی قیمتیں کم ہوئیں گزشتہ ہفتے کے دوران چکن فی کلو 78 روپے 32 پیسے مہنگا ہوا، مرغی کی فی کلو قیمت 346.34 روپے سے بڑھ کر 424.66 روپے ہو گئی۔
اسی طرح ایک ہفتے میں ٹماٹر فی کلو 10 روپے 56 پیسے مہنگے ہوئے، پیاز کی فی کلو قیمت 3 روپے 34 پیسے ،لہسن فی کلو 8 روپے 44 پیسے مہنگا ہوا۔
ادارہ شماریات کی رپورٹ میں یہ بھی کہا گیا کہ گزشتہ ہفتے کے دوران چینی کی فی کلو قیمت میں 3 روپے 52 پیسے کا اضافہ ہوا، چینی کی فی کلو اوسطاً قیمت 184 سے بڑھ کر 188 روپے 44 پیسے تک پہنچ گئی جب کہ گڑ،انڈے،تازہ دودھ،دہی،دال ماش اور کیلے بھی مہنگی ہونے والی اشیاء میں شامل ہے۔
دوسری جانب ایک ہفتے کے دوران ایل پی جی کا گھریلو سلنڈر 82 روپے 98 پیسے سستا ہوا، دال مونگ فی کلو 1 روپے 65 پیسے اورگندم کا آٹا،ڈالڈا گھی اور آئل بھی سستی ہونے والی اشیاء میں شامل ہیں، علاوہ ازیں بریڈ،بیف،مٹن،نمک،چائے کی پتی سمیت 26 اشیاء کی قیمتیں مستحکم رہیں۔
