کراچی: (دنیا نیوز) گورنرسندھ کامران خان ٹیسوری سےچیئرمین بزنس مین گروپ زبیرموتی والا کی سربراہی میں وفد نے ملاقات کی اور بارشوں سے انفراسٹرکچر کی خستہ حالی کے متعلق آگاہ کیا۔
کاروباری برادری کے وفد میں کے سی سی آئی کےصدرجاوید بلوانی،ادریس میمن، فیصل خان اوریونس مکڈا شامل تھے، ملاقات میں ڈاکٹرخالد مقبول صدیقی، سینئرمرکزی رہنما ڈاکٹر فاروق ستار اور امین الحق بھی شریک ہوئے۔
کاروباری وفد نےحالیہ بارشوں کے بعد انفراسٹرکچر کی خستہ حالی، سیوریج کے مسائل اور صنعتی علاقوں میں بجلی کی طویل بندش پر خدشات کا اظہار کیا، گورنرسندھ سے ان مسائل کے حل کے لیے فوری اقدامات کی اپیل کی۔
زبیر موتی والا نے کہا کہ کراچی پاکستان کا بزنس حب ہے، صنعتوں کا پہیہ چلے گا تو ملک آگے بڑھے گا۔
گورنر سندھ نے وفد کو تعاون کی یقین دہانی کرائی اورکہا کہ مسائل کے حل کے لیے صوبائی حکومت سے بھی بات کروں گا، کاروباری برادری کے مسائل کو ترجیحی بنیادوں پر حل کرنا وقت کی اہم ضرورت ہے۔
