کراچی: (دنیا نیوز) حکومت سندھ نے ای وی ٹیکسی لانچ کرنے کی تیاریاں تیز کر دیں، حکومت سندھ کی جانب سے دسمبرمیں ای وی ٹیکسی متعارف کروانے کا فیصلہ کیا گیا ہے۔
سینئر وزیر شرجیل انعام میمن کی زیر صدارت اہم اجلاس ہوا، اجلاس میں سیکرٹری ٹرانسپورٹ، سندھ ماس ٹرانزٹ اتھارٹی کی ایم ڈی کنول نظام بھٹو اور دیگر حکام نے شرکت کی۔
اجلاس میں سینئر وزیر شرجیل انعام میمن کو صوبے میں جاری ٹرانسپورٹ منصوبوں پر تفصیلی بریفنگ دی گئی۔
شرجیل انعام میمن نے کہا کہ حکومت سندھ پاکستان میں پہلی باراپنی ٹیکسی سروس شروع کرنے جا رہی ہے، کوشش ہے دسمبر 2025 تک ای وی ٹیکسی سروس بھی عوام کو فراہم کر دی جائے۔
سینئر صوبائی وزیر نے کہا کہ بلاول بھٹوزرداری چاہتے ہیں کہ عوام کو جدید، ماحول دوست اور معیاری سفری سہولیات ملیں، ابتدائی مرحلے میں آنے والی ای وی ٹیکسیوں میں خواتین کے لیے ٹیکسیاں مخصوص کی جائیں گی۔
.jpg)
شرجیل انعام میمن کا کہنا تھا کہ حکومت سندھ نے پاکستان میں پہلی بارماحول دوست ای وی بسیں اور خطے میں پہلی بار خواتین کے لیے پنک بس سروس متعارف کرائی۔
انہوں نے کہا کہ خواتین اور طالبات کے لیے پنک سکوٹی پروگرام کو بھی عوامی سطح پر بڑی پذیرائی ملی ہے، خواتین کیلئے پنک ای وی ٹیکسی کے ساتھ ساتھ حکومت سندھ ملک کی پہلی ای وی ٹیکسی بھی شروع کرنے جا رہی ہے۔
سینئر صوبائی وزیر نے کہا کہ کراچی میں ٹرانسپورٹ کے مسائل کم کرنے کے لیے ڈبل ڈیکر بسیں اور مزید ای وی بسیں بھی جلد شامل ہوں گی، ای وی گاڑیوں کے لیے انفراسٹرکچر اور چارجنگ سٹیشنز کی تیاری پر بھی کام جاری ہے۔
شرجیل انعام میمن کا کہنا تھا کہ خواتین کو محفوظ اور سستی سفری سہولیات فراہم کرنا حکومت سندھ کا عزم ہے، بین الاقوامی سرمایہ کاروں کیلئے کراچی میں ٹرانسپورٹ کے شعبے میں سرمایہ کاری کے وسیع مواقع موجود ہیں۔
سینئر صوبائی وزیر نے کہا کہ حکومت سندھ ٹرانسپورٹ کے شعبے میں سرمایہ کاروں کو ہر ممکن تعاون فراہم کرے گی۔
