لاہور (دنیا نیوز ) یو اے ای میں ٹیسٹ سیریز کے لئے پاکستان اور آسٹریلیا کی تیاریاں عروج پر پہنچ گئیں، سیریز کا لوگو جاری کر دیا گیا، دونوں ٹیموں کے درمیان پہلا ٹیسٹ 7 اکتوبر کو دبئی میں کھیلا جائے گا۔
ٹیسٹ سیریز کی تیاریاں جاری ہیں، قومی ٹیم نے متحدہ عرب امارات کے گرم موسم میں خوب پسینا بہایا، کوچنگ سٹاف کی نگرانی میں کھلاڑیوں نے مختلف ڈرلز بھی کیں۔
آسٹریلوی ٹیم نے بھی خوب پریکٹس کی، مچل سٹارک اور نیتھن لیون گرین شرٹس کو مشکلات میں ڈالنے کے لئے تیار ہیں، کینگروز بلے باز بھی کچھ کر دکھانے کو بے تاب ہیں۔
پی سی بی نے ٹیسٹ سیریز کا لوگو جاری کر دیا، پاکستان اے اور آسٹریلیا کا چار روزہ ٹور میچ برابری پر ختم ہوا تھا۔ پاکستان اور آسٹریلیا کے درمیان دو میچوں کی ٹیسٹ سیریز کا پہلا مقابلہ سات اکتوبر سے دبئی میں شروع ہوگا۔
