اسلام آباد: (دنیا نیوز) چیئرمین سی ڈی اے محمد علی رندھاوا نے کہا ہے کہ اسلام آباد میں فی الحال سٹیڈیم کی تعمیر کا ارادہ نہیں۔
میڈیا سے گفتگو کرتے ہوئے چیئرمین سی ڈی اے نے کہا ہے کہ اسلام آباد میں کرکٹ سٹیڈیم تاحال تعمیر کرنے کا ارادہ نہیں ہے تاہم شہر میں کرکٹ اور فٹبال کے 25، 25 گراؤنڈز بنائیں گے۔
انہوں نے کہا ہے کہ اسلام آباد میں کرکٹ سٹیڈیم بنانے پر پی سی بی کے ساتھ میٹنگ ہوئی ہے، ماہرین کی رائے کے بعد دیکھیں گے کہ اسلام آباد میں کہاں کرکٹ سٹیڈیم تعمیر کرنا ہے، سٹیڈیم کی تعمیر کے لیے ماہرین ہی لوکیشن کا انتخاب کریں گے۔
چیئرمین سی ڈی اے کا کہنا تھا کہ اسلام آباد میں فی الوقت کرکٹ گراؤنڈز کے برے حالات ہیں، کرکٹ گراؤنڈز کی پچز کو انٹرنیشنل معیار کا بنانا ہے۔
محمدعلی رندھاوا نے مزید کہا کہ اسلام آباد میں مختلف کھیلوں کے گراؤنڈز بنانے کے منصوبے ہیں، ایف 9 پارک میں گراؤنڈ اپگریڈ کرنے کے لیے راشد لطیف کی معاونت لی ہے۔
واضح رہے کہ اس سے قبل یہ خبریں سامنے آئی تھیں کہ سی ڈی اے نے اسلام آباد کے ایف نائن پارک میں سٹیڈیم بنانے کا فیصلہ کیا ہے تاہم اس حوالے سے شدید ردعمل آنے پر سی ڈی اے نے بعد ازاں وضاحت جاری کی تھی پارک میں کسی نئے سٹیڈیم کو بنانے کا منصوبہ نہیں ہے۔
