لاہور: (دنیا نیوز) جنوبی افریقہ کے خلاف ٹیسٹ سیریز کے لیے قومی ٹیم کے سپورٹ سٹاف میں اضافے کا امکان ہے جس کا باقاعدہ اعلان چیئرمین پی سی بی کی منظوری کے بعد ہوگا۔
ذرائع کے مطابق جنوبی افریقہ کے خلاف دو ٹیسٹ میچز کے لیے سابق کرکٹر عمران فرحت کی بطور معاون بیٹنگ کوچ خدمات حاصل کی جا سکتی ہیں جبکہ سپن بولنگ کوچ عبدالرحمان اور فیلڈنگ کوچ عبدالمجید کو بھی ٹیم مینجمنٹ کا حصہ بنانے کی تجویز ہے۔
نیشنل کرکٹ اکیڈمی کے یہ تینوں کوچز اس وقت لاہور میں جاری قومی ٹیسٹ ٹیم کے کیمپ میں ذمہ داریاں نبھا رہے ہیں، ان کو سپورٹ سٹاف کا باقاعدہ حصہ بنانے کی تجویز پر حتمی فیصلہ جلد ہو گا۔
ذرائع کے مطابق پاکستان اور جنوبی افریقہ کے درمیان پہلا ٹیسٹ میچ 12 اکتوبر کو قذافی سٹیڈیم لاہور میں جبکہ دوسرا ٹیسٹ 20 اکتوبر سے راولپنڈی میں شیڈول ہے، دونوں میچز کے لیے سپن ٹریک بنایا جاسکتا ہے جس پر ساجد خان، نعمان علی اور آصف آفریدی کارگر ثابت ہو سکتے ہیں۔
