سیہون شریف:(دنیانیوز) سیہون شریف میں کاروکاری کے الزام میں دہرے قتل کا لرزہ خیز واقعہ پیش آیا ہے ۔
پولیس کے مطابق سیہون شریف کے نواحی گاؤں بھوتڑا میں ملزمان نے 18 سالہ لڑکی نمانی رند اور 25 سالہ نوجوان میر خان رند کو تیزدھار اوزار سے گلا کاٹ کر قتل کردیا۔
واقعے کی اطلاع ملتے ہی پولیس کی بھاری نفری جائے وقوعہ پر پہنچ گئی اور دونوں کی لاشیں سید عبداللہ شاہ انسٹیٹیوٹ سیہون منتقل کردیں ۔
پولیس کے مطابق دونوں ملزمان کو بھی گرفتار کرلیا گیا ہے جن کی شناخت ولی محمد رند اور منیر رند کے نام سے ہوئی ہے، ملزمان کے قبضے سے قتل میں استعمال ہونے والا تیزدار اوزار بھی برآمد کرلیا گیا ۔
دہرے قتل کے بعد علاقے میں خوف وہراس پھیل گیا جبکہ پولیس کی جانب سے واقعے کا مقدمہ تاحال درج نہیں ہوسکا۔
