لاہور: (دنیا نیوز) امیر بالاج ٹیپو قتل کیس میں اہم پیشرفت سامنے آئی ہے، مرکزی ملزم خواجہ تعریف گلشن عرف طیفی بٹ کو دبئی سے گرفتار کر لیا گیا۔
پنجاب پولیس نے کارروائی انٹرپول کی مدد سے عمل میں لائی، طیفی بٹ کو جلد از جلد پاکستان منتقل کرنے کیلئے قانونی کارروائی جاری ہے اور توقع ہے کہ کیس کے مرکزی ملزم کو آئندہ چند روز میں لاہور پہنچا دیا جائے گا۔
یاد رہے کہ امیربالاج ٹیپو جو لاہور کی ایک معروف سیاسی و سماجی شخصیت تھے، کو کچھ عرصہ قبل اندوہناک طریقے سے قتل کر دیا گیا تھا، اس ہائی پروفائل کیس میں طیفی بٹ کو مرکزی منصوبہ ساز اور ماسٹر مائنڈ قرار دیا گیا تھا۔
قتل کے بعد طیفی بٹ ملک سے فرار ہو کر متحدہ عرب امارات (دبئی) میں روپوش ہوگیا تھا، جس کے بعد پنجاب پولیس نے انٹرپول کے ذریعے اس کی گرفتاری کیلئے ریڈ وارنٹ جاری کئے تھے۔
پولیس کا مؤقف دیتے ہوئے کہنا ہے کہ طیفی بٹ کی گرفتاری اس کیس میں ایک بڑی پیشرفت ہے، اسے قانون کے کٹہرے میں لایا جائے گا اور امیر بالاج کے قاتلوں کو کیفر کردار تک پہنچایا جائے گا۔
