کراچی: (دنیا نیوز) اینٹی نارکوٹکس فورس (اے این ایف) نے منشیات سمگلنگ کی بڑی کوشش ناکام بنا دی۔
ترجمان کے مطابق اے این ایف نے انٹیلی جنس بیسڈ کارروائی میں 154.15 ملین امریکی ڈالر مالیت کی منشیات برآمد کر لی، اے این ایف پنجگور میں بین الاقوامی ڈرگ ٹریفکنگ تنظیم کی مسلسل نگرانی کر رہی تھی۔
اے این ایف ٹیموں نے فوری کارروائی کرتے ہوئے گیس کنٹینر کو ایم 8 گوادر سی پیک روڈ پر روک کر تلاشی لی، موقع پر تلاشی کے دوران 553.5 کلو گرام آئس اور 40 کلو گرام ہیروئن قبضے میں لے لی گئی، قبضے میں لی گئی منشیات کی قیمت انٹرنیشنل مارکیٹ میں 154.15 ملین امریکی ڈالر ہے۔
حکام کا کہنا ہے کہ منظم سمگلنگ نیٹ ورک کے 2 کارندے بھی گرفتار کر کے مقدمات درج کر لئے گئے۔
بدنام زمانہ سمگلر علی جان کی سربراہی میں یہ گروہ افغانستان سے منشیات کو پنجگور سے تربت، گوادر اور پسنی کے راستے سمگل کرتا تھا، یہ گروہ بھاری منشیات کو یمن تنزانیہ اور دیگر ممالک تک سپیڈ بوٹس اور چھوٹی کشتیوں کے ذریعے سمگل کرتا تھا۔
ترجمان کے مطابق منشیات کو ایل پی جی گیس کنٹینر ٹرک میں چھپا کر پنجگور سے گوادر اور پھر بیرونِ ملک اسمگل کرنے کا منصوبہ بنایا گیا تھا، یہ اینٹی نارکوٹکس فورس کی جانب سے انسداد منشیات کیلئے خشکی پر کی جانے والی سب سے بڑی کارروائی میں سے ایک ہے۔
حکام کا کہنا ہے کہ منشیات میں ملوث دیگر ملزمان اور سہولت کاروں کی گرفتاری کیلئے کوششیں جاری ہیں، زیرو ٹالرنس پالیسی پر عمل پیرا اے این ایف منظم ڈرگ نیٹ ورکس کے خاتمے کیلئے بھرپور کاروائیاں جاری رکھے ہوئے ہے۔
