لاہور: (ویب ڈیسک) بادام کو عام طور پر دماغی صحت کا بہترین ذریعہ سمجھا جاتا ہے تاہم طبی ماہرین کا کہنا ہے کہ بادام میں دماغ کو تیز کرنے کی کوئی جادوئی طاقتیں موجود نہیں ہیں ۔
اس میں کوئی شک نہیں کہ بادام غذائیت سے بھرپور خوراک کا ماخذ ہیں، تاہم یہ براہ راست دماغ کو طاقت دینے کیلئے کوئی جادوئی اثر نہیں رکھتے۔
اس کے برعکس بادام میں بہت سے غذائی اجزاء موجود ہیں جو مختلف حوالوں سے دماغی افعال پر مثبت اثر ضرور ڈال سکتے ہیں۔
بادام وٹامن ای سے بھرپور ہوتے ہیں جو دماغی خلیوں کو تناؤ اور سوزش سے بچانے میں مدد کرتا ہے، اسی طرح بادام میگنیشیم کا ایک اچھا ذریعہ ہیں جو اعصابی صحت میں اہم کردار ادا کرتا ہے، یادداشت اور سیکھنے کے عمل پر بھی مثبت اثر ڈال سکتا ہے۔
بادام صحت بخش چکنائی کے حصول کا بھی بہترین ذریعہ ہیں، صحت بخش چکنائی دماغ کی مجموعی صحت کیلئے فائدہ مند ہے، بادام میں پروٹین ہوتا ہے جو علمی افعال کو سہارا دینے اور دماغ کیلئے توانائی کا ایک مستحکم ذریعہ فراہم کر سکتا ہے۔
علاوہ ازیں بادام میں موجود فائبر خون میں شوگر کی سطح کو مستحکم رکھنے میں مدد دیتا ہے جو ذیابیطس کے انتظام اور دماغی افعال کیلئے اہم ہے۔
اگرچہ صرف بادام کھانے سے آپ ذہنی طور پر باصلاحیت نہیں ہوسکتے لیکن ان کو دیگر متوازن غذاؤں میں شامل کرکے دماغی صحت کے ساتھ ساتھ صحت مند زندگی کو مجموعی طور پر کافی بہتر بنا سکتے ہیں۔
اس مقصد کے حصول کیلئے ضروری ہے کہ اچھی خوراک کا استعمال کیا جائے، باقاعدگی سے ورزش کی جائے اور دماغی افعال کو بہتر بنانے کیلئے علمی سرگرمیوں میں مشغول رہا جائے۔
