لندن: (دنیا نیوز) پاکستان تحریکِ انصاف کے چیئرمین عمران خان نے کہا ہے کہ تاریخ میں پہلی مرتبہ پاکستانی سپہ سالار جمہوریت کی پشت پناہی کر رہے ہیں۔ یہ بھی تاریخ کا اہم موڑ ہے کہ عدلیہ آزادی سے اپنا آئینی کردار نبھا رہی ہے۔
برطانوی اراکینِ پارلیمان سے عمران خان نے اپنے خطاب بین الاقوامی معاملات خصوصاً کشمیر اور امریکا کے ساتھ تعلقات پر کھل کر بات کی۔ ان کا کہنا تھا کہ برطانیہ تنازعہ کشمیر کے حل میں اہم کردار ادا کرنے کی استطاعت رکھتا ہے، مگر بھارتی وزیرِاعظم نریندر مودی کی موجودگی میں کامیابی کی قابلِ ذکر توقع نہیں ہے۔
پاک امریکا تعلقات پر بات کرتے ہوئے عمران خان کا کہنا تھا کہ امریکا کے ساتھ پاکستان کے تعلقات کو خوشگوار قرار دینا ممکن نہیں ہے۔ امریکا عالمی طاقت ضرور ہے مگر اسے پاکستان کے نکتہ نظر کو سمجھنا ہو گا۔ امریکا کے پاس اپنی ناکامیوں کا ملبہ پاکستان کے سر ڈالنے کا کوئی استحقاق نہیں ہے۔ ان کا کہنا تھا کہ امریکا کے ساتھ خوشگوار تعلقات ٹھیک مگر یہ باہم احترام اور معاملات کی مناسب تفہیم پر استوار ہونے چاہیں۔
چیئرمین پی ٹٰی آئی نے کہا کہ پاکستان تیزی سے بہتری کی جانب گامزن ہے۔ تاریخ میں پہلی مرتبہ پاکستانی سپہ سالار جمہوریت کی پشت پناہی کر رہے ہیں۔ یہ بھی تاریخ کا اہم موڑ ہے کہ عدلیہ آزادی سے اپنا آئینی کردار نبھا رہی ہے۔
ان کا کہنا تھا کہ سابق وزیرِاعظم میاں نواز شریف اپنے سیاسی مخالفین کو سزائیں دلوانے کیلئے اپنے وفادار جج استعمال کرتے تھے۔ آڈیو ٹیپس موجود ہیں جن سے ظاہر ہوتا ہے کہ نواز شریف کیسے ججوں کو نکیل ڈالتے۔
انہوں نے کہا کہ انسانوں کی ترقی پر وسائل خرچ کرنا انتہائی اہمیت کا حامل ہے۔ تعلیم پر خصوصی توجہ اور محنت کی ضرورت ہے۔ مدارس میں زیرِ تعلیم بچے ہمارے ہیں، جنہیں اپنانے کی ضرورت ہے۔ نوجوانوں کیلئے فراہمی روزگار کا انتظام میری نگاہ میں اہم ترین ذمہ داری ہے۔
عمران خان نے کہا کہ 29 اپریل کو مینار پاکستان سے ملک گیر انتخابی مہم کا آغاز کریں گے۔ اپنے سو روزہ منصوبے میں نوجوانوں کیلئے فراہمی روزگار کو کلیدی حیثیت دیں گے۔ دنیا بھر میں بسنے والے 70 لاکھ پاکستانی حقیقی اثاثہ ہیں۔ سمندر پار پاکستانیوں کو سرمایہ کاری کا معقول ماحول فراہم کیا گیا تو سی پیک سے بڑی سرمایہ کاری میسر آئے گی۔
